У Мінскай вобласці шукаюць работнікаў на заробак больш за $11 тысяч. Праца ў лесе, прапанова ад арабскага бізнэсу
У агульнарэспубліканскім банку вакансій амаль 98 тысяч прапаноў, у 90% выпадкаў заробкі не перавышаюць 1000 рублёў. Аднак бываюць і нечаканыя вакансіі. Так, у Мінскай вобласці шукаюць менеджараў, якім гатовыя плаціць больш за 11 тысяч даляраў. Што трэба рабіць за такія грошы?
Вакансія належыць кампаніі «КПІ Спешыл Проджэктс», якая, кажуць, звязана з капіталам ААЭ і атрымала ўчастак для палявання ў Лагойскім раёне.
У 2013 годзе Лукашэнка сваім указам з грыфам «для службовага карыстання» даў у арэнду на 99 гадоў участкі зямлі ў Лагойскім і Смалявіцкім раёне. Катару дасталася каля 25 квадратных кіламетраў лясоў на 99 гадоў. У 2014 годзе 32 квадратныя кіламетры атрымалі прадстаўнікі Аб’яднаных арабскіх эміратаў, іх сцягі лунаюць у Лагойскім раёне. Што ад гэтага мае Беларусь? Як паведамляў TUT.BY, арэндная плата ў перспектыве павінна скласці каля $300 тысяч за год, але ў першыя гады сума нашмат меншая.
Кампанія «КПІ Спешыл Проджэктс» шукае двух менеджараў на 29 600 рублёў са спецыфічнымі ўменнямі. Акрамя вышэйшай адукацыі і англійскай мовы на прасунутым узроўні, трэба таксама мець досвед працы на кіраўнічых пасадах у сферы лясной і паляўнічай гаспадаркі, а таксама на кіруючых пасадах са штатам падначаленых не менш за 10 чалавек. У дадатак павінен быць пяцігадовы досвед егера і досвед дрэсіроўкі і ўзаемадзеяння з жывёламі. І пажадана, каб быў таксама досвед атрымання дазволу на ўвоз і вываз жывёл.
Такі спецыяліст павінен умець эксплуатаваць і абслугоўваць цяжкую тэхніку: грэйдары, трактары, экскаватары, франтальныя пагрузчыкі і гэтак далей. Вішанька на торце: акрамя ўсяго вышэйпералічанага спецыяліст павінен умець распрацоўваць стратэгіі развіцця сацыяльных сетак, валодаць інструментамі інтэрнэт-прасоўвання і таргетаванай рэкламы.
А што астатнім?
З амаль 98 тысяч вакансій амаль па 89 тысячам прапануюць заробак да 1000 рублёў бруднымі. То бок пасля сплаты абавязковых плацяжоў работнік атрымае 860 рублёў — прыкладна $338, калі браць цяперашні курс.
Аднак тысяча рублёў — гэта яшчэ выдатны заробак, бо па 47 тысячам вакансій працадаўцы абяцаюць плаціць не больш за 700 рублёў. У такім выпадку на рукі работнікі атрымаюць 602 рублі або $239.
Яшчэ па 8736 вакансій прапаноўваюць зарплаты не больш за 400 рублёў, то бок мінімальныя. Праўда, па многіх з іх прапаноўваецца праца на няпоўны дзень.
Вышэй за 1000 рублёў бруднымі працадаўцы гатовыя плаціць па 8 841 вакансіі. Пры гэтым у 8495 выпадках прапаноўваюць ад тысячы да дзвюх.
Больш за 2000 рублёў гатовыя плаціць толькі ў 343 выпадках.
Цяпер чытаюць
Турэцкі лаўрэат прэміі Чэчкі быў у захапленні ад Беларусі і рэжыму ў ёй. А пасля трапіў на Акрэсціна9
Каментары