У сацсетках абмяркоўваюць дзіўную карціну — дзясяткі мёртвых птушак на вуліцах Мінска. Сініцы, вераб’і… «Ці судны дзень наперадзе, ці чума якая», — каментуюць гараджане. Папрасілі арнітолагаў патлумачыць, што здарылася.
Насамрэч такая карціна паўтараецца штогод. Пачынаецца восеньская міграцыя, і многія птушкі падчас яе гінуць ад сутыкнення з шыбамі.
«Сезон размнажэння скончыўся, і мігруе вельмі шмат маладых птушак, якія толькі-толькі навучыліся лятаць, але да многіх варыянтаў небяспекі не прызвычаены.
У прыродзе няма аналагаў вертыкальным празрыстым шыбам, і птушка не разумее, што туды не варта ляцець. Некаторыя дарослыя навучаюцца іх адрозніваць, але маладыя не прыстасаваныя, таму часцей гінуць.
Ёсць, канечне, невялікі ўнёсак іншых натуральных фактараў — інфекцыі, тое, што маладыя птушкі не могуць часам здабыць ежу. Але асноўнае — восеньская міграцыя», — тлумачыць арнітолаг «Аховы птушак Бацькаўшчыны» Максім Нямчынаў.
Гарадскія птушкі — вялікая сініца, блакітная сініца, вераб’і дамавыя і палявыя — не адлятаюць на поўдзень, а вандруюць недалёка ад месцаў гнездавання. Пакуль птушаняты раслі, дарослыя збіралі ежу побач з гнёздамі. А калі там корм скончыўся, сталі шукаць яго на іншых тэрыторыях.
Напрыклад, сініца вывелася ў Парку Чалюскінцаў, а зараз лятае па малых насаджэннях уздоўж праспекта Незалежнасці і збірае насякомых.
«Пазней у верасні будзе яшчэ хваля міграцыі: шэраг птушак (напрыклад, слонка) лятуць на вышыні па-над дрэвамі, што выклікае сутыкненне з будынкамі ў цемры», — дадае Максім Нямчынаў.
Каб менш птушак гінула ад сутыкнення са шклом, арнітолагі прапануюць абклейваць шыбы рознымі выявамі. Ці фарбаваць іх адмысловымі ультрафіялетавамі маркерамі — гэта лепшы варыянт, бо птушкі ультрафіялет добра бачаць, а для чалавека гэты малюнак будзе амаль незаўважны.
«Самі хутка здохнуць». Фоты з саміта ў Мінску даюць пабачыць Пуціна і Лукашэнку без грыму, а таксама Колю12
Каментары