Лукашэнка ў інтэрв'ю CNN: Калі вы нас будзеце атакаваць і пазбаўляць незалежнасці, я буду вечным прэзідэнтам
Аляксандр Лукашэнка ў інтэрв'ю CNN заявіў, што не збіраецца быць «прэзідэнтам да смерці», але адзначыў, што ўсё будзе залежаць ад сітуацыі ў Беларусі, і не выключыў, што будзе «вечным прэзідэнтам», калі Захад працягне «атакаваць» краіну, перадае БелаПАН.
«Клянуся табе, я не збіраюся быць прэзідэнтам нават да смерці. Прысягаць. Усё будзе залежаць ад сітуацыі ў Беларусі.
Калі вы, вашы патроны на Захадзе, адкуль заўгодна, не будуць умешвацца ў нашу сітуацыю і мы будзем адчуваць сябе ўпэўнена і спакойна як суверэнная, незалежная дзяржава, як народ, які заслужыў быць суверэнным і незалежным, — паверце, усё здарыцца раней, чым вы думаеце. Але калі толькі вы асмельваецеся яшчэ раз, як у мінулым годзе, умяшацца ў нашы падзеі, будзе дрэнна. Будзе так, як вы думаеце цяпер», — заявіў Лукашэнка ў інтэрв'ю CNN, поўная версія якога была апублікаваная 2 кастрычніка на YouTube.
Лукашэнка таксама адказаў на пытанне, ці не думае ён сысці ў адстаўку, бо знаходзіцца на прэзідэнцкай пасадзе ўжо 27 гадоў.
«Слухайце, я 27 гадоў, як вы сказалі, на гэтай пасадзе служу свайму народу, але я яшчэ не дасягнуў таго ўзросту, як у вас у вашым вашынгтонскім абкаме. Там, па-мойму, прэзідэнт — колькі яму, 88 ужо? Ну хутка 90. Таму давайце возьмем за арыенцір узрост вашага патрона ў Вашынгтоне. А чаму б не? Але вы не хвалюйцеся, я не дацягну да гэтага ўзросту, — адказаў Лукашэнка. —
Таму прэзідэнтам можа быць чалавек столькі, колькі ён пажадае, і яго абярэ народ. Але калі ён здаровы і можа кіраваць краінай. У нас няпростая сітуацыя, таму тут павінен быць энергічны, здаровы чалавек, якога абярэ народ, і ён будзе жадаць быць прэзідэнтам. Вось гэтыя галоўныя ўмовы».
«Але я аб адным сказаў: павінен быць мір і спакой, каб не разбурылася тое, што я ствараў як першы прэзідэнт Беларусі. Калі вы нас будзеце атакаваць, увесь час нас бамбіць, пазбаўляць свайго слова, свайго твару і сваёй незалежнасці, я буду вечным прэзідэнтам. Я буду абараняць тое, што я стварыў разам з беларускім народам, нават коштам свайго жыцця», — падсумаваў Лукашэнка.
Цяпер чытаюць
У інтэрнэт злілі перапіску Кавалеўскага і Ціханоўскай. Але канцоў не знайсці31
Каментары