Чалавек памёр пасля таго, як занадта хутка выпіў паўтара літра кока-колы. Тлумачым чаму
Тры павучальныя гісторыі пераказаў Марк Газлян у сваім медычным блогу на партале французскага выдання «Монд».
Самы свежы з гэтых выпадкаў — гісторыя 22-гадовага кітайца, які сканаў у бальніцы ў Пекіне, пасля таго як у спякотны дзень за 10 хвілін выжлукціў 1,5 літра колы.
Хлопцу стала кепска, яго прывезла ў бальніцу хуткая дапамога са скаргамі на вострыя болі ў верхняй частцы жывата.
Тамограф паказаў бурбалкі газу ў вялікай вене, якая нясе кроў ад усяго стрававальнага тракту да печані, і ў сценках кішак, а таксама ішэмію печані.
18 гадзінаў рэанімацыйных захадаў не ўратавалі маладога чалавека.
У гэтага пацыента выпіванне вялікага аб’ёму колы за такі кароткі час выклікала назапашванне вялікага аб’ёму газу ў стрававальным тракце і хуткае падвышэнне ціску ў кішэчніку, з-за чаго газ трапіў у вену. Гэты незвычайны клінічны выпадак апісалі ў маі 2021 году хірургі шпіталя Чааян у Пекіне ў часопісе Clinics and Research in Hepatology and Gastroenterology.
Другі трагічны выпадак здарыўся ў Турцыі ў месяц Рамадан, калі прававерныя мусульмане трымаюць пост, ім забаронена есці днём.
Пасля дванаццаці гадзін поўнага ўстрымання ад ежы згаладалы хлопчык з'еў адразу дзве вялікія асновы для піцы з мясным фаршам і гароднінай — агульным аб’ёмам 180 г цеста, 120 г мяса і 100 г гародніны. Пасля гэтага ён з’еў 300 г марозіва, вялікі пакет чыпсаў і вінаград, а смагу наталіў, выпіўшы ажно літр газіроўкі. Даставілі хлопчыка ў шпіталь з уздутасцю жывата ў моцнай форме. На жаль, праз 45 хвілінаў ён памёр у рэанімацыі. Пра гэты выпадак паведамілі ў 2017 годзе турэцкія дзіцячыя хірургі ў часопісе Pediatric Emergency Care.
Падобны ж выпадак апісалі ўжо японскія судмедэксперты: 36-гадовы мужчына з лёгкімі разумовымі адхіленнямі падчас 1,5-гадзіннага візіту ў рэстарацыю з сябрамі з’еў некалькі порцый шашлыку, а таксама дзве вялікія порцыі сушы, дадаў наверх рысу з кары, смажанае кураня, бульбы і дэсертаў.
Ды ўсё тое запіў шматлікімі безалкагольнымі напоямі. Напрыканцы застолля яму стала кепска, ён быў вымушаны прылягчы. Па вяртанні дадому лепш не стала, і бацька адвез яго ў клініку, дзе яму далі лекі для аблягчэння стрававання ды выправілі дадому. Праз пяць гадзін мужчына ў нязменным стане трапіў ужо ў іншую бальніцу, атрымаў яшчэ лекаў для стрававання і вярнуўся дадому. Трэці візіт, ужо ў трэцюю бальніцу, і зноў вяртанне дадому. Без паляпшэння стану мужчына ў чацверты раз выправіўся ў шпіталь, але ў дарозе яму стала ўжо зусім блага, і хуткая дапамога завезла яго ў рэанімацыю, бо самастойна дыхаць ён ужо не мог. Дактары выкарысталі страўнікавы зонд, каб адсмактаць два літры змесціва, але было позна: пацыент памёр.
Ускрыццё паказала надзвычай расцягнуты страўнік і некроз сценак страўніка. Абструкцыя дванаццаціперснай кішкі спыніла апаражненне страўніка і пераціснула брыжэечную артэрыю. Медыкі падкрэсліваюць, што пры пашырэнні страўніка патрэбна ранняя дыягностыка і хуткае лячэнне: «клініцысты мусяць мець на ўвазе, што вострае пашырэнне страўніка можа адбыцца ў выніку простага пераядання нават у людзей, нясхільных да разладу харчовых паводзінаў».
Гэтыя недарэчныя трагедыі нагадваюць нам, піша Марк Газлян, што ўсё ж маюць рацыю старыя бабульчыны парады есці павольна, добра перажоўваючы ежу, ды падымацца з-за стала з пачуццём лёгкага недаедання, а не з раздзьмутым трыбухом.
Цяпер чытаюць
Топавы перакладчык паехаў у Беларусь мяняць пашпарт — і сеў за данаты. «КДБ паглядзеў на суму і вырашыў, што ніхто ў здаровым розуме не можа выдаткаваць столькі ўласных грошай»
Каментары