«Мой Улюбёны — нібы гор вышыні»

Яшчэ ня вельмі багатая на здабыткі беларуская хрысьціянская дыскаграфія нядаўна папоўнілася новым дыскам — «Песьні Духа вялікіх містыкаў Кармелю», які запісалі берасьцейскія грэка‑католікі з харызматычнай супольнасьці «Маран ата».

Гэты дыск (наклад яго 1000 ас.) уяўляе сабой цэльную музычную кампазіцыю з 14 песьняў у спалучэньні з урыўкамі з Сьвятога Пісаньня, агульны час гучаньня яго больш за гадзіну. Дыск стаў ня толькі першым для музыкантаў гэтай харызматычнай супольнасьці ў Берасьці, але і першым музычным праектам, зьдзейсьненым у Беларускай Грэка‑Каталіцкай Царкве.

Каардынатарам гэтага музычнага праекту зьяўляецца рэгент хору берасьцейскай грэка‑каталіцкай парафіі сьвятых братоў‑апосталаў Пятра і Андрэя спн. Вольга Граськова.

Яна (расіянка!) зрабіла пераклад на беларускую мову вершаў вялікіх містыкаў Кармелю — сьв. Яна ад Крыжа, сьв. Тэрэзы Авільскай і сьв. Тэрэзы з Лізье, а таксама зьяўляецца аўтарам музыкі і аранжыроўкі да шэрагу песьняў, што гучаць на дыску. Як адзначаюць сябры гэтай харызматычнай супольнасьці, духоўнасьць манахаў‑кармялітаў і іх вялікіх сьвятых па сваёй прыродзе блізкая да ўсходняй і моцна паўплывала на духоўнасьць самой «Маран аты». Песьні ў выкананьні грэка‑католікаў з Берасьця выклікалі захапленьне ў беларускіх кармялітаў і яны таксама аказалі сваю падтрымку ў выданьні гэтага дыску.

У гэтым музычным праекце акрамя Вольгі Граськовай (клавішы, сінтэзатар — разам з Віталём Усьцямчуком), бралі ўдзел таксама Сяргей Карнялюк (гітара, вакал), Вольга Дрык (скрыпка), Натальля Амельянюк, Марына Гаўрута і Вераніка Тарасюк.

Варта таксама адзначыць, што ўсе тэксты песьняў на словы кармяліцкіх сьвятых сабраныя і выдадзеныя асобнай кніжачкай, якая ўкладзена ў кампакт‑дыск.

Першыя выступы з прэзентацыяй дыску «Песьні Духа» адбыліся на шматлюдным фэсьце ў Гудагаі ў гонар цудатворнай іконы Маці Божай і ў касьцёле ў Нарачы, дзе працуюць айцы‑кармяліты. Пачынаючы з верасьня ўдзельнікі гурта спадзяюцца таксама выступіць з сваёй праграмай на вершы вялікіх містыкаў Кармелю і ў іншых мясьцінах Беларусі.

Адносна набыцьця кампакт‑дыску «Песьні Духа вялікіх містыкаў Кармелю» можна зьвяртацца да а. Ігара Кандрацьева ня яго e‑mail: [email protected] і па тэлефонах: (+375 162) 24‑74‑82, (+375 29) 724‑74‑82.

Дыск можна набыць таксама і ў парафіях, дзе працуюць айцы‑кармеліты.

ІБ

• 0
• 0
• 0
• 0
• 0
• 0
• 0
• 0