Novy dysk ź biełaruskimi chryścijanskimi śpievami.
Jašče nia vielmi bahataja na zdabytki biełaruskaja chryścijanskaja dyskahrafija niadaŭna papoŭniłasia novym dyskam — «Pieśni Ducha vialikich mistykaŭ Karmielu», jaki zapisali bieraściejskija hreka‑katoliki z charyzmatyčnaj supolnaści «Maran ata».
Hety dysk (nakład jaho 1000 as.) ujaŭlaje saboj celnuju muzyčnuju kampazicyju z 14 pieśniaŭ u spałučeńni z uryŭkami ź Śviatoha Pisańnia, ahulny čas hučańnia jaho bolš za hadzinu. Dysk staŭ nia tolki pieršym dla muzykantaŭ hetaj charyzmatyčnaj supolnaści ŭ Bieraści, ale i pieršym muzyčnym prajektam, ździejśnienym u Biełaruskaj Hreka‑Katalickaj Carkvie.
Kaardynataram hetaha muzyčnaha prajektu źjaŭlajecca rehient choru bieraściejskaj hreka‑katalickaj parafii śviatych bratoŭ‑apostałaŭ Piatra i Andreja spn. Volha Hraśkova.
Jana (rasijanka!) zrabiła pierakład na biełaruskuju movu vieršaŭ vialikich mistykaŭ Karmielu — śv. Jana ad Kryža, śv. Terezy Avilskaj i śv. Terezy ź Liźje, a taksama źjaŭlajecca aŭtaram muzyki i aranžyroŭki da šerahu pieśniaŭ, što hučać na dysku. Jak adznačajuć siabry hetaj charyzmatyčnaj supolnaści, duchoŭnaść manachaŭ‑karmialitaŭ i ich vialikich śviatych pa svajoj pryrodzie blizkaja da ŭschodniaj i mocna paŭpłyvała na duchoŭnaść samoj «Maran aty». Pieśni ŭ vykanańni hreka‑katolikaŭ ź Bieraścia vyklikali zachapleńnie ŭ biełaruskich karmialitaŭ i jany taksama akazali svaju padtrymku ŭ vydańni hetaha dysku.
U hetym muzyčnym prajekcie akramia Volhi Hraśkovaj (kłavišy, sintezatar — razam z Vitalom Uściamčukom), brali ŭdzieł taksama Siarhiej Karnialuk (hitara, vakał), Volha Dryk (skrypka), Natalla Amieljaniuk, Maryna Haŭruta i Vieranika Tarasiuk.
Varta taksama adznačyć, što ŭsie teksty pieśniaŭ na słovy karmialickich śviatych sabranyja i vydadzienyja asobnaj knižačkaj, jakaja ŭkładziena ŭ kampakt‑dysk.
Pieršyja vystupy z prezientacyjaj dysku «Pieśni Ducha» adbylisia na šmatludnym feście ŭ Hudahai ŭ honar cudatvornaj ikony Maci Božaj i ŭ kaściole ŭ Naračy, dzie pracujuć ajcy‑karmiality. Pačynajučy ź vieraśnia ŭdzielniki hurta spadziajucca taksama vystupić z svajoj prahramaj na vieršy vialikich mistykaŭ Karmielu i ŭ inšych miaścinach Biełarusi.
Adnosna nabyćcia kampakt‑dysku «Pieśni Ducha vialikich mistykaŭ Karmielu» možna źviartacca da a. Ihara Kandraćjeva nia jaho e‑mail: [email protected] i pa telefonach: (+375 162) 24‑74‑82, (+375 29) 724‑74‑82.
Dysk možna nabyć taksama i ŭ parafijach, dzie pracujuć ajcy‑karmielity.
Kamientary