Распаўсюджваецца інфармацыя, што беларускія войскі зайшлі ў Чарнігаўскую вобласць. Здаецца, тэрабарона проста няправільна ідэнтыфікавала расійскія знакі
Пра беларускія войскі ва Украіне паведаміў спікер рэгіянальнага ўпраўлення сіл тэрабароны «Поўнач» Віталь Кірылаў. Па яго словах, калону тэхнікі заўважылі сёння і ідэнтыфікавалі па маркіроўцы.
Пазней у прэс-службе аператыўнага камандавання «Поўнач» дадалі, што прысутнасць беларускіх войскаў на Чарнігаўшчыне фіксуюць ужо трэці дзень. Ідэнтыфікуюць іх па маркіроўцы ў выглядзе знака «О». Таксама там дадалі, што ў беларусаў слабы баявы дух і яны не хочуць ваяваць супраць украінцаў.
Але дакументальных пацвярджэнняў прысутнасці беларусаў ва Украіне (фота, відэа, дакументаў) няма. Іншых крыніц, акрамя Кірылава, няма таксама.
Раней па ўкраінскіх тэлеграм- і тэлеканалах дэманстравалі табліцу распазнавання сімвалаў на расійскай вайсковай тэхніцы, дзе сімвалам O абазначаныя «сілы з Беларусі».
Калі з’явілася відэа са знакам «О» на тэхніцы, былі зробленыя высновы, што на Чарнігаўшчыну ўвайшлі беларусы.
Насамрэч, на ўсіх відэа з Беларусі вайсковая тэхніка Расіі мела сімвал V.
Пакуль няма ніводнага пацверджання ўдзелу беларускіх вайскоўцаў у вайне ва Украіне. Лукашэнка ўсяляк гэта таксама абвяргае. У той жа час ён прызнаў, што ракетныя ўдары па тэрыторыі Украіны наносіліся з тэрыторыі Беларусі і на аснове звестак беларускай разведкі.
Шматлікія відэазапісы і здымкі са спадарожнікаў таксама даказваюць, што расійскія войскі ўварваліся ва Украіну ў тым ліку з тэрыторыі Беларусі, і беларускія сілавыя структуры ніяк гэтаму не супрацьдзейнічалі.
У той жа час тысячы беларусаў узялі ўдзел у акцыях пратэсту супраць нападу на Украіну. Вядома пра як мінімум 865 затрыманых на іх.
Калі з’явяцца дакументальныя пацверджанні прысутнасці беларускіх вайскоўцаў ва Украіне, мы пра гэта паведамім.
Цяпер чытаюць
Бетанаваць грошы — нацыянальная ідэя беларусаў? Параўналі тэмпы будаўніцтва ў Беларусі, Польшчы, Літве і Латвіі7
Каментары