Астраномы знайшлі падобную да Зямлі планету каля суседняй да Сонца зоркі
Міжнародная група астраномаў адкрыла новую планету зямнога тыпу, якая круціцца вакол суседняй зоркі. Знойдзеная экзапланета атрымала абазначэнне Ross 508 b і адносіцца да класа планет «Надзямля», паведамляе Phys.org.
«Надземлямі» навукоўцы называюць большыя за Зямлю планеты, якія не перавышаюць масу Няптуна — восьмай планеты Сонечнай сістэмы.
Астраномы з дапамогай японскага тэлескопа «Субару» высветлілі, што гэтая планета як мінімум у чатыры разы большая за Зямлю. Яна круціцца вакол карлікавай зоркі класа М, якая малая і адносна халодная ў параўнанні з Сонцам.
Планета Ross 508 b размяшчаецца ў сістэме, якую можна назваць нашым адносным суседам — за 36,6 светлавых гадоў ад Зямлі. Таксама планета зацікавіла навукоўцаў з-за таго, што яна круціцца ў так званай «зоне Златаўласкі» — прасторы паблізу зоркі, дзе тэмпература спрыяльная для існавання вадкай вады, а такім чынам, патэнцыйна і для жыцця.
Назіраючы за нябесным целам, навукоўцы высветлілі, што планета робіць абарот вакол сваёй зоркі прыблізна за 10,75 дня.
Нягледзячы на тое, што планета наўрад ці будзе прыдатнай для жыцця, якое мы бачым на нашай планеце, яе адкрыццё дапаможа навукоўцам шукаць планеты, падобныя на Зямлю, паблізу зорак, якія ззяюць слабей за сонца.
Цяпер чытаюць
«Паднябеннага збіваў былы начальнік калоніі». Вось што расказваюць пра палітвязня, які загінуў за кратамі ў 36 гадоў8
Каментары