Дачка Мікалая Аўтуховіча запусціла тэрміновы збор на аплату працы адвакатаў
Суд ідзе цяпер інтэнсіўна, без перапынкаў, цягнецца штодня да 18.30, так што абвінавачаныя не паспяваюць на вячэру. Усе скаргі і хадайніцтвы адхіляюцца. Відавочна, стараюцца паспець вынесці прысуды да нейкага тэрміну. Тым часам сродкі на адвакатаў амаль вычарпаныя, паведамляе «Новы час».
«У Мікалая два адвакаты, але на працэсе заўсёды прысутнічае толькі адзін з іх, каб ашчадзіць сродкі (у кошт паслуг уключана і аплата за жытло, бо суд ідзе ў Гродне, а адвакаты мінскія).
Сябар Мікалая, які аплачваў паслугі аднаго з адвакатаў, больш такой магчымасці мець не будзе, сродкаў з папярэдняга збору засталося на пару дзён. Таму цяпер вельмі патрэбная дапамога.
Любы ўнёсак будзе важным і патрэбным.
Мікалай на дзіва хутка ўзнаўляе сілы пасля галадоўкі. Ужо ўжывае звычайную ежу і нават заказаў сала, цыбулю і часнок у перадачу. Лісты даходзяць толькі ад мамы і дачкі (але гэта прагрэс, раней і ад дачкі не аддавалі). Пасылкі, бандэролі, лісты і грошы на банкаўскі рахунак таксама будуць для Мікалая неацэннай падтрымкай.
Адрас: вул. Кірава, 1, турма 1, 230023, г. Гродна. Аўтуховічу Мікалаю Мікалаевічу».
Каментары