У Гродне не хапіла сродкаў, каб дабудаваць школу да новага навучальнага года
Новую школу будуюць у мікрараёне Грандзічы-3. Яна будзе чатырохпавярховай, з басейнам і трэнажорнай залай, разлічаная на 44 класы для 1020 вучняў. Першапачаткова адкрыццё планавалі на жнівень 2022 года, пасля тэрміны змяніліся. Прычына затрымак — няма сродкаў, піша «Вечерний Гродно».
Зараз ступень гатоўнасці будынка — прыблізна 70%. Узведзеная каробка, гатовыя вокны, устаўленыя вітражы, расказаў прараб участка Сяргей Суркант. Далей па плане — дах, аздабленне і вентыляцыя, але пакуль грошай няма. Калі фінансаванне будзе, будаўніцтва скончаць да восені 2023 года, паведамляе выданне.
Да канца 2022 года на школу павінны выдзеліць 3,5 млн рублёў. Гэтыя сродкі пойдуць на завяршэнне контуру будынка і падключэнне ацяплення.
Школу ў мікрараёне Грандзічы-3 пачалі будаваць у канцы снежня 2020 года. Будаўніцтва ідзе за кошт сродкаў абласнога бюджэту ў рамках інвестыцыйных праграм Гродзенскай вобласці на 2020, 2021 і 2022—24 гады. А пакуль дзеці з Грандзіч ездзяць вучыцца ў школы ў мікрараёне Дзевятоўка — СШ № 32, 27 і 28.
Каментары