Майстар з сякерай. У Брэсце адкрываецца незвычайная народная выстава
28 кастрычніка ў выставачнай зале ДзУК «Брэсцкі АГКЦ» (Брэст, вул. Савецкая, 54) адкрыецца персанальная выстава народнага майстра Беларусі Івана Супрунчыка. Яна называецца «Майстар. Творца. Паляшук» і прысвечана 80-годдзю з дня нараджэння дырэктара цэнтра драўлянай скульптуры вёскі Цераблічы Столінскага раёна, піша «Вечерний Брест».
Усе свае выдатныя работы Іван Піліпавіч стварае з дапамогай сякеры. Здаецца, грубага інструмента для мастацтва. Але, як кажа ён сам, «сячэ» ўсё жыццё. Вяскоўцы пазнаюць сябе ў драўляных скульптурах… Мае шмат узнагарод, выставы ладзіліся ў розных краінах.
На юбілейнай выставе будуць паказаны скульптурныя кампазіцыі, графічныя і жывапісныя работы твораў Івана Супрунчыка. Усе яны адлюстроўваюць старажытныя абрады, народныя святы і традыцыі. Майстар выканаў іх у дрэве або намаляваў.
Цікава, што займацца з фарбамі Іван пачаў з дзевяці гадоў. Яго ніхто не вучыў, у Цераблічах да 1956 года не было нават электрычнасці. Але ён пешшу хадзіў за 18 кіламетраў у Давыд-Гарадоцкую бібліятэку, каб пачытаць кнігі пра мастакоў і мастацтва. Потым працаваў мастаком-афарміцелем у калгасе «Праўда», маляваў транспаранты, лозунгі. Скончыў Магілёўскі бібліятэчны тэхнікум. У Церабліцкай сельскай бібліятэцы адпрацаваў 36 гадоў… Вучыўся ў Завочным народным універсітэце мастацтваў (Масква) на факультэце малюнка і жывапісу… Але сапраўдным натхненнем і захапленнем заўсёды была і застаецца творчасць.
Наведаць выставу можна да 13 лістапада.
Па ўласніку «Софтклуба» Сіротку, які сядзіць у СІЗА КДБ, прыляцела і ад Польшчы — на яго крыптабіржу Bynex наклалі санкцыі2
Каментары