ААТ «Быхаўскі кансервава-агароднінасушыльны завод» прызнаны банкрутам. Эканамічны суд Магілёўскай вобласці паведамляе пра яго ліквідацыю, піша Sputnik. Ліквідацыйны працэс адкрыты па 30 чэрвеня 2023 года.
На сайце Быхаўскага райвыканкама гаворыцца, што прадпрыемства з'яўляецца адным з найбуйнейшых вытворцаў плодаагародніннай кансервацыі ў Беларусі. Асартымент кансерваў, якія тут выпускаліся, прадстаўлены больш за 200 найменнямі.
Пакупніку прадукцыя гэтага завода была вядомая пад брэндамі «Хозяин-Барин» і «Закатки с грядки».
Не так даўно на прадпрыемстве была праведзена мадэрнізацыя, але гэта не дапамагло. На гэты момант прадпрыемства мае даўгоў каля 11,4 мільёна рублёў. У 2021 годзе аб'ём вытворчасці зменшыўся амаль напалову ў параўнанні з 2020-м, піша Sputnik са спасылкай на рашэнне суда. У асноўным ён апошнім часам выпускаў кансерваваны гарошак, кукурузу, ікру з кабачкоў і бярозавы сок.
Пэўны час сыравіну (гарох і кукурузу) на прадпрыемстве перапрацоўвалі ніжэй за сабекошт, але доўга гэта працягвацца не магло.
Частка маёмасці ААТ ужо прададзеная, але для поўнага пагашэння даўгоў гэтых сродкаў не хапіла.
Каментары