Міністэрства антыманапольнага рэгулявання і гандлю паведаміла, што ў выніку правядзення праверкі ТАА «Белагароднінагандаль» быў выяўлены факт рэалізацыі плодаагародніннай прадукцыі па завышаных цэнах. У выніку кампанію аштрафавалі на больш чым 580 тысяч рублёў.
Паводле інфармацыі МАРГ, у перыяд з красавіка 2021 года да снежня 2022-га пры пастаўцы свежай бульбы, рэпчатай цыбулі, морквы, буракоў, белакачаннай капусты, а таксама свежых яблыкаў названая кампанія замест акрэсленай лімітнай максімальнай надбаўкі 30% выкарыстоўвала аптовую надбаўку да 267,19%.
У прэс-службе Міністэрства дадалі, што за азначанае парушэнне Эканамічны суд Гомельскай вобласці прыцягнуў гэтую арганізацыю да адміністрацыйнай адказнасці з накладаннем штрафу ў двухразовым памеры неабгрунтавана атрыманай выручкі — 584 216,16 рубля.
Акрамя таго, да адміністрацыйнай адказнасці таксама прыцягнулі службовую асобу, адказную за фарміраванне цэн.
Каментары