Частцы беларусаў ва Украіне не выдаюць грашовыя выплаты ад ААН. У чым прычына?
З праблемай атрымання грашовых пераводаў ад ААН сутыкнуліся некаторыя беларусы, што беглі з краіны праз палітычны пераслед і цяпер жывуць ва Украіне.
Скарга ва Укрпошту ад валанцёркі Ірыны Лукашэнкі наконт немагчымасці атрымання грашовых выплат ад ААН. Фота: архіў Ірыны Лукашэнкі
Раней, адразу пасля пачатку поўнамаштабнай вайны 24 лютага 2022 года, беларусам ва Украіне заблакавалі банкаўскія рахункі. У пастанове Нацбанка Украіны №18 было сказана: «Спыніць ажыццяўленне банкамі расходных аперацый па рахунках рэзідэнтаў Расійскай Федэрацыі / Рэспублікі Беларусь». Выключэнне — беларусы-вайскоўцы (тыя ж каліноўцы), пазней і некаторыя беларускія журналісты: БАЖ дамаглася разблакіроўкі рахункаў журналістаў ва Украіне, накіроўваючы звароты ва ўладныя структуры. Але і гэта пратрывала нядоўга. Сёлета ў сакавіку рахункі заблакавалі паўторна.
Арына Коршунава, журналістка «Радыё Свабода», пацвярджае, што каля года змагла пакарыстацца сваёй карткай, адкрытай ва ўкраінскім банку. Але вясной рахунак зноў заблакавалі з усімі сродкамі, што былі на ім:
«Працую журналісткай, маю пацвярджэнні ад Службы бяспекі Украіны пра сваю пазіцыю наконт вайны, размаўляю па-ўкраінску лепей і часцей за палову Кіева, але, на думку ўладаў, не заслугоўваю мець грошы на картцы ў аніводным з банкаў Украіны», — дзеліцца дзяўчына.
Для вырашэння праблемы з легалізацыяй ва Украіне, многія беларусы падавалі дакументы на бежанства. Разгляд іх тут можа доўжыцца гадамі, у гэты час адзіным дакументам, які выдаецца міграцыйнай службай у абмен на пашпарт, лічыцца даведка пра зварот па абарону ва Украіне.
Сама працэдура адбываецца пад эгідай Упраўлення Вярхоўнага камісара ААН па справах бежанцаў. Адпаведна ад ААН раз на тры месяцы выплачваецца грашовая дапамога тым, хто падаўся на такую абарону: грошы прыходзяць тэрміновым пераводам на імя чалавека праз Укрпошту, таму для атрымання не трэба мець банкаўскага рахунку, а дастаткова прыйсці ў любое аддзяленне з дакументам ад міграцыйнай службы.
Сёння ж і гэтыя выплаты для беларусаў сталі недасяжнымі: даведка пра зварот па абарону супрацоўнікаў пошты ўжо не задавальняе, патрабуюць альбо пашпарт грамадзяніна Украіны, альбо пасведчанне на пастаяннае пражыванне (даведка такі статус не мае).
Валанцёрка Іра Лукашэнка ў статусе падачы на бежанства ўжо амаль паўтара года. Апошнія два пераводы ад ААН атрымлівала ў галоўным аддзяленні на Хрышчаціку:
«Сёння я прыйшла да той жа аператаркі, якая абслугоўвала мяне раней. І яна сказала, што правілы змяніліся: цяпер па маім дакуменце яна мой перавод мне не аддасць, — расказвае дзяўчына (у яе даведка пра зварот па абарону). — Паказала мне спіс дакументаў, па якіх атрымаць перавод можна. Там ёсць дакументы бежанцаў, але мой, атрымліваецца, не з тых…»
Пасля гэтага Ірына звярнулася ў іншае аддзяленне пошты, там дзяўчыне ўжо раздрукавалі карпаратыўны ліст, у якім зазначана, што перавод беларусам могуць выдаць, калі ёсць «рэгістрацыя месцазнаходжання ва Украіне».
«У маім пасведчанні ёсць адрас майго пражывання тут. Але і гэтага аказалася недастаткова. Я напісала скаргу генеральнаму дырэктару Укрпошты. Я застаюся ва Украіне, таму што люблю яе і хачу, каб яна перамагла. І паказваю гэта не толькі словамі, але і справамі. Гэта ведаюць і бачаць усе, у тым ліку органы дзяржаўнай улады Украіны. Але праблемы з рахункамі, грашовымі пераводамі і іншым ад гэтага не знікаюць».
Грошы ад ААН Ірына планавала патраціць на тое, каб зладзіць чарговую акцыю ў Кіеве да Дня беларускай культуры: бясплатна пачаставаць украінцаў халадніком.
«Такую акцыю ў парку Шаўчэнкі мы ўсё роўна зробім, але зробім не дзякуючы, а насуперак!»
У аналагічнай сітуацыі аказаліся і іншыя беларусы Украіны. Анархіст Ілья Сянько з Баранавічаў уцёк ад палітычнага пераследу на радзіме ў Кіеў у 2021 годзе. Хлопец сутыкнуўся з праблемай легалізацыі пасля пачатку ўварвання: аддзяленні міграцыйнай службы не прымалі дакументы.
«Я звярнуўся па дапамогу ў ААН, намагаюся падацца на бежанства. Мала таго, што міграцыйка сістэматычна парушае законы Украіны, так яшчэ цяпер я не магу атрымаць грашовую дапамогу ад ААН. Лічу гэта дыскрымінацыяй і парушэннем правоў чалавека!» — абураецца актывіст.
На гарачай лініі Укрпошты нам зазначылі, што дзеянні супрацоўнікаў, якія не выдаюць пераводы, правамерныя:
«Тое, што такія пераводы выдаваліся раней, было памылкай нашых супрацоўнікаў, бо ёсць пастанова Нацбанка Украіны №18, мы абапіраемся на яе. Таму калі ў вас будзе іншы дакумент — пашпарт грамадзяніна Украіны ці пасведчанне на пастаяннае пражыванне ва Украіне, — прыходзьце, вам выдадуць перавод».
«Запускайце далей салюты, а я выклічу міліцыю». Беларусы спрачаюцца пра забарону на феерверкі2
Каментары