Штогадовы некамерцыйны літаратурна‑мастацкі праект «Выявы» з’яўляецца ініцыятывай наймаладзейшага пакалення беларускіх літаратараў.
Першае мерапрыемства было паспяхова праведзена 6 снежня 2008 года. Сёлета ў падрыхтоўцы «Выяваў» задзейнічана болей за дваццаць творцаў, сярод якіх — пісьменнікі, мастакі, фатографы, дызайнеры, рэжысёры, музыканты.
Ідэя праекта «Выявы‑2009» палягае ў выступленнях‑дыялогах.
Прычым аўтары звяртаюцца да сінтэзу розных відаў мастацтва. Разам на адной сцэне, у супольным творчым дзеянні можна будзе пабачыць Людмілу Рублеўскую і Вераніку Шніп, Віктара Жыбуля і Джэці, Анатоля Івашчанку і Усевалада Сцебураку, Алёну Беланожка і Маргарыту Аляшкевіч… Барды Ната Пушкарова і Паша Кузіч упершыню прадставяць сумесную песню.
Да выступлення Уладзімера Арлова і Андрэя Хадановіча прымеркаваны паказ эксклюзіўнай сумеснай фотасесіі вядомых пісьменнікаў, што была праведзена двума маладымі таленавітымі фатографамі.
З «віртуальнымі» удзельнікамі «Выяваў» — мастаком Аляксеем Раўскім (Беларусь ‑‑ Францыя) і рэжысёрам Джонатанам Дрысколам (Канада) можна будзе пазнаёміцца дзякуючы іх творам, пра якія раскажуць вядучыя Юлія Новік і Віка Трэнас.
Да ўсяго, кожны наведнік атрымае ў падарунак самвыдатаўскую электронную кнігу беларускіх коміксаў, аб’яднаных пацешным літаратурным персанажам ‑‑ Блакітным Свінам. Кружэлка будзе запісаная адмыслова для праекта «Выявы‑2009: Дыялог зорак».
5 снежня (субота) у 18.00 у Тэатры расейскага рамансу (вул. Чыгуначная, д. 27, корп. 2).
Каментары