У Добрушы пачынаецца суд над дэлегатам УНС, дэпутатам і «кіраўніком года»
У судзе Добрушскага раёна 8 лістапада пачынаецца крымінальны працэс над групай абвінавачаных па карупцыйных артыкулах: «Крадзеж шляхам злоўжывання службовымі паўнамоцтвамі», «Службовы падлог», «Перавышэнне ўлады або службовых паўнамоцтваў», а таксама «Злоўжыванне ўладай або службовымі паўнамоцтвамі». Па версіі следства, злачынцамі аказаліся заслужаныя асобы, якім прысвойвалі ганаровыя званні ў той час, калі яны займаліся карупцыяй, піша «Флагшток».
Як раней паведамляў «Флагшток», адным з фігурантаў гэтай справы стаў экс-начальнік упраўлення сельскай гаспадаркі і харчавання Добрушскага райвыканкама Яўген Ігнаценка. Судовы расклад паказаў маштаб крымінальнай справы: пад суд трапіла амаль уся сельгасэліта раёна.
Разам з Ігнаценкам перад судом паўсталі кіраўнікі мясцовых гаспадарак. У прыватнасці, гэта Руслан Сакалоў, які ў 2019 годзе на пасадзе дырэктара сельгаспрадпрыемства «Церахоўка-Агра» быў названы пераможцам у намінацыі «Кіраўнік года».
У ліку абвінавачаных — і іншыя кіраўнікі гаспадарак. Ёсць сярод іх і дзейныя дэпутаты мясцовых саветаў, а акрамя таго — дэлегат на «Усебеларускі народны сход» ад Добрушскага раёна. Гэта дырэктар ААТ «Калінінскі» Віктар Байдаў.
«Працуе выключна прадукцыйна і эфектыўна, невялікімі выдаткамі працы дасягае значных вынікаў. Адрозніваецца дысцыплінаванасцю, выканаўчасцю, прынцыповасцю, патрабавальны да сябе і падначаленых. Валодае добрымі арганізатарскімі здольнасцямі», — такую характарыстыку яму давалі ў 2020 годзе.
Таксама сярод фігурантаў справы — кіраўніца сельгаспрадпрыемства «Жгунскае» Наталля Сцяпанава, дырэктарка ААТ «Чырвоная Буда» Ірына Бяздольная і іншыя абвінавачаныя.
Па версіі следства, аграрыі займаліся прыпіскамі з мэтай прадэманстраваць высокія паказчыкі вытворчасці і рэалізацыі малака. У выніку рэальныя аб'ёмы вытворчасці малака ў Добрушскім раёне былі завышаныя на 5 тыс. тон.
Фігурантам прыпісваюць злачынную дзейнасць у перыяд за 2019-2022 гады — якраз у той час, калі некаторым цяпер абвінавачаным давалі ганаровыя званні, станоўчыя характарыстыкі, адпраўлялі на УНС.
«Экс-кіраўнікам прад'яўлена абвінавачванне ў даванні і выкананні незаконных указанняў на афармленне фіктыўнай дакументацыі, якая ўплывае на высокія паказчыкі па вытворчасці і рэалізацыі малака. Работнікі сельгаспрадпрыемстваў бясспрэчна выконвалі незаконныя ўказанні вышэйзгаданага прадстаўніка органа ўлады», — гаварылася ў паведамленні Следчага камітэта.
Што тычыцца былога намесніка старшыні райвыканкама, то ў яго «зоне інтарэсаў знаходзіліся аўтамабільнае паліва, будаўнічыя матэрыялы — шыфер, сценавыя блокі, якія належаць гаспадаркам»:
«Гэтыя матэрыялы былі выкарыстаныя пры будаўніцтве лазні для яго патрэб. Дарэчы, паслугі рабочых па яе будаўніцтве аплачаныя таксама за кошт сродкаў аднаго з сельгаспрадпрыемстваў. Выкрадаліся і іншыя матэрыяльныя каштоўнасці, якія належаць юрыдычным асобам. Напрыклад, намеснік старшыні райвыканкама сістэматычна ладзіў банкеты, для якіх сумесна з дырэктарам адной з гаспадарак рэгулярна выкрадаў прадукцыю ўласнай вытворчасці сельгаспрадпрыемства», — удакладнялі ў СК.
Паводле інфармацыі ведамства, падчас следства абвінавачаныя пакрылі амаль 100 тыс. рублёў шкоды. На адрас сельгаспрадпрыемстваў Гомельскай вобласці, мясцовых органаў улады і кіравання, органаў статыстыкі і службаў, якія адказваюць за ветэрынарны нагляд, было ўнесена 17 прадстаўленняў. Па выніках іх разгляду да дысцыплінарнай і матэрыяльнай адказнасці прыцягнута 49 службовых асоб і іншых работнікаў.
Цяпер чытаюць
Ці выйдзе біяграфія Пазняка і ў чым галоўная праблема беларускай літаратуры? Янушкевіч — пра тыражы і канкурэнцыю з рускай кнігай4
Ці выйдзе біяграфія Пазняка і ў чым галоўная праблема беларускай літаратуры? Янушкевіч — пра тыражы і канкурэнцыю з рускай кнігай
«Людзі, будзьце пільныя! У такой сітуацыі можа апынуцца кожны жыхар ЕС!» Грамадзянін Літвы, асуджаны ў Беларусі да 13 гадоў за «шпіянаж», перадаў ліст з калоніі3939
Каментары