У віленскіх школах перастануць вывучаць рускую мову як другую замежную
З новага навучальнага года ў віленскіх школах перастануць прапаноўваць рускую мову для вывучэння ў якасці другой замежнай. Як пішуць літоўскія СМІ са спасылкай на віцэ-мэра горада Арунаса Шылерыса, рашэнне звязана з планамі павысіць сярод вучняў папулярнасць моў краін — членаў Еўрасаюза.
«З верасня мы больш не будзем прапаноўваць шасцікласнікам выбіраць рускую мову ў якасці другой замежнай. Муніцыпалітэт створыць умовы для тых, хто ўжо вывучае рускую мову як замежную, каб замяніць яе на адну з моў Еўрапейскага саюза», — прыводзіць словы Арунаса Шылерыса LRT.
Замест рускай мовы шасцікласнікі змогуць абраць у якасці другой мовы французскую, нямецкую або іспанскую.
На папулярызацыю моў краін — членаў ЕС мэрыя Вільні выдзеліла 1 млн еўра.
Адзначаецца, што цяпер у Літве каля 70% вучняў выбіраюць вывучэнне рускай мовы ў якасці другой замежнай.
Каментары