Прэзідэнт Літвы Гітанас Наўседа пазбавіў прадстаўленага ў парадку выключэння літоўскага грамадзянства балерыну Ілзэ Ліепу, перадае LRT.
Ліепа звярнулася па грамадзянства Літвы (у яе таксама ёсць расейскае) у 2000 годзе. Тады яна выступала з літоўскім артыстам Пятрасам Скірмантасам. Яе хадайніцтва задаволілі і ўручылі пашпарт.
Ініцыятыва пазбавіць балерыну грамадзянства ўзнікла пасля таго, як Ліепа, якая мае літоўскае і расійскае грамадзянства, у інтэрв'ю расійскім СМІ асудзіла паводзіны краін Балтыі і выказала падтрымку вайне прэзідэнта Расіі Уладзіміра Пуціна ва Украіне.
Згодна з Законам аб грамадзянстве, асоба пазбаўляецца грамадзянства Літвы, набытага ў парадку выключэння, калі сваімі дзеяннямі ставіць пад пагрозу інтарэсы бяспекі Літвы або публічна выказвае падтрымку дзяржаве, якая ставіць пад пагрозу інтарэсы бяспекі Літвы.
У адпаведнасці з гэтым палажэннем Наўседа ў верасні 2023 года пазбавіў літоўскага грамадзянства фігурыстку Маргарыту Драбязка, якая разам з мужам Павіласам Ванагасам удзельнічала ў праектах, арганізаваных Таццянай Наўкай, жонкай прэс-сакратара прэзідэнта Расіі.
Каментары