Святароў з Шуміліна судзілі дыстанцыйна, а затрымалі не толькі іх
Суд над затрыманымі ў Шуміліне каталіцкімі святарамі Анджэем Юхневічам і Паўлам Лемехам адбыўся 10 траўня дыстанцыйна. Як расказалі вернікі выданню Katolik.life, затрыманых не прывозілі ў суд і разглядалі іх адміністрацыйную справу праз скайп.
Вынік суда вернікам і духавенству не паведамілі, аднак вядома, што святары застаюцца ў зняволенні — гэта значыць, ім быў прысуджаны адміністрацыйны арышт.
Айцец Анджэй Юхневіч і айцец Павел Лемех з ордэну Місіянераў аблатаў Беззаганнай Марыі, якія служаць у дыяцэзіянальным санктуарыі ў Шуміліне, былі затрыманыя ў Шуміліне 8 траўня.
Паведамленні адносна зняволеных святароў выпусціла польская правінцыя Місіянераў-аблатаў. Яна запрасіла да малітвы «ў сувязі з цяжкім становішчам» двух місіянераў, якія былі затрыманыя, адзначаецца ў камунікаце.
Супольную малітву Ружанца прызначылі на вечар 10 траўня «ў інтэнцыі вызвалення субратоў». З гэтага таксама вынікае, што святары застаюцца за кратамі. Занепакоенасць сітуацыяй і сваю салідарнасць выказаў з Рыма генерал кангрэгацыі.
Раней польская правінцыя паведамляла, што паводле яе звестак падставай затрымання стала падазрэнне ў нейкай «дыверсійнай дзейнасці».
Katolik.life звязаўся з правінцыяй з просьбай патлумачыць, што маецца на ўвазе, бо ў польскай мове dywersyjna działalność можа мець розныя сэнсы. Аднак там адказалі, што не могуць паведаміць нічога, акрамя афіцыйна апублікаванай інфармацыі.
Акрамя таго, Katolik.life расказалі пра яшчэ адно затрыманне ў Шуміліне.
У той жа дзень, калі сілавікі прыехалі да святароў, толькі на некалькі гадзін раней, па месцы працы затрымалі свецкую верніцу, парафіянку касцёла ў Шуміліне. Гэта маладая жанчына, педагог, удзельніца душпастырства моладзі Віцебскай дыяцэзіі, раней была вакалісткай музычнага гурта. Цяпер яна таксама знаходзіцца ў зняволенні ў Віцебску.
Дарэчы, нягледзячы на зняволенне, акаўнты затрыманых у сацыяльных сетках былі актыўнымі ўдзень 10 траўня.
Цяпер чытаюць
У адкрытым доступе апублікавалі базу 4000 штатных супрацоўнікаў КДБ, імёны агентаў і інфарматараў не называюць6
Каментары