Былая сяброўка Паўла Дурава заявіла, што мае ад яго траіх дзяцей
Афіцыйна лічыцца, што заснавальнік Telegram мае двух дзяцей. Цяпер іх колькасць узрасла да пяці. Расказваем падрабязнасці.
Паводле звестак Forbes, Павел Дураў з'яўляецца бацькам траіх дзяцей ураджэнкі Ленінграда Ірыны Болгар, якая цяпер жыве ў Швейцарыі.
Сама жанчына расказала выданню, што яны з Паўлам (які малодшы за яе на чатыры з паловай гады) пазнаёмілася летам 2012 года, а праз паўгода сталі жыць разам. У снежні 2013-га ў пары нарадзілася дачка Лея, у студзені 2016 года — сын Даніэль, а ў верасні 2017-га — сын Давід.
Па словах жанчыны, неўзабаве пасля нараджэння малодшага сына Дураў прылятаў у Расію для таго, каб вырашыць фармальнасці з яго рэгістрацыяй. Выданне звяртае ўвагу, што сам Павел сцвярджае, нібыта ў Расіі не быў з 2014 года.
Да 2018 года Ірына з дзецьмі жыла ў Санк-Пецярбургу, затым пераехала да Дурава ў Дубай. Але там не атрымалася легалізавацца. У выніку спачатку яна перабралася ў Латвію, а затым (у 2020-м) у Швейцарыю.
Болгар расказала, што, нягледзячы на тое, што ў апошнія гады Дураў з імі не жыве, яны разам шмат падарожнічаюць.
Выданне нагадвае, што афіцыйна ў заснавальніка Telegram двое дзяцей ад Дар'і Бандарэнкі, з якой ён вучыўся на адным курсе. Гэта дачка Аліна, што нарадзілася ў 2009 годзе, і сын Міхаіл (2010). Абое дзяцей маюць ягонае прозвішча.
Чаму Ірына Болгар вырашыла расказаць пра сумесных з Дуравым дзяцей толькі летам гэтага года? Жанчына сцвярджае, што зрабіла гэта дзеля іх саміх — дзеці крыўдзяцца, што пра дваіх старэйшых у інтэрнэце пішуць, а пра іх нічога няма.
Па словах адвакатаў — спецыялістаў па грамадзянскіх справах, з якімі размаўлялі журналісты Forbes, прычынай могуць быць матэрыяльныя прэтэнзіі да Дурава з боку Болгар. Магчыма, жанчына папрасіла ў мільярдэра больш грошай на дзяцей ці нейкіх гарантый для іх, а ён адмовіўся.
Сам Дураў ніяк заяву Ірыны Болгар не пракаментаваў.
У Польшчы арыштавалі былога кіраўніка беларускага «Паспалітага рушэння» — пагражае 10 год за наркотыкі26
Каментары