Ціханоўская: Давайце разам паказваць дзецям, што свабода і справядлівасць займаюць важнае месца ў нашым жыцці
Святлана Ціханоўская ў Дзень абароны дзяцей звярнулася да беларусаў з пасланнем пра тое, як рэжым у Беларусі ўплывае на будучыню краіны і як мы ўсе можам абараніць дзяцей ад несправядлівасці, страху і прапаганды.
Святлана Ціханоўская падзялілася асабістай гісторыяй.
«На пытанне да маіх дзяцей, пра што яны мараць, мая дачка Агнія адказвае: «Каб тата вярнуўся». І дадае: «Ці каб да яго нашы лісты дайшлі». А Карней сумуе па нашых сямейных паездках на лецішча і бацькіных шашлыках, хаця яшчэ пяць гадоў таму наракаў і скардзіўся, што не хоча выязджаць з горада. Вось ужо пяць гадоў мае дзеці жывуць і мараць пра тое, што павінна быць натуральнай часткай дзяцінства.
Я ведаю, што пра падобнае мараць і іншыя дзеці, чые сем’і раздзяліў рэжым — зноў быць разам, зноў пачуць дарагі голас», — кажа Ціханоўская.
У Дзень абароны дзяцей яна расказвае, як дзяржава разлучае дзяцей з бацькамі, пра іншыя цяжкасці, з якімі сутыкаюцца сёння дзеці.
«Прапаганда ў школах, прымусовыя зборы ў падтрымку рэжыму, загон у БРСМ і ўдзел у ягоных вар’яцкіх акцыях. А многіх дзетак увогуле не бяруць у секцыі ці кружкі толькі таму, што іх сем’і прызнаныя «неблагонадежными», бо іх бацькі мелі смеласць выказацца супраць несправядлівасці…
Рэжым вымушае дзяцей баяцца, маўчаць і ахвяраваць сваімі жаданнямі на карысць улад. Рэжым вучыць іх быць ціхімі, «не высоўвацца», імкнецца ўкараніць думку, што ўсё вырашаюць «людзі наверсе», — кажа яны
Яна заклікае бацькоў абараняць дзяцей ад цкавання з боку «ідэалагічных» настаўнікаў, вучыць дзяцей гаварыць на роднай мове, а не саромецца яе.
«Тлумачыць, што значыць талерантнасць. Заахвочваць пытанні, цікавасць, жаданне разбірацца ў тым, што адбываецца навокал. Калі мы хочам, каб дзеці раслі ў краіне без страху, з правам на голас, давайце разам паказваць ім, што свабода і справядлівасць займаюць важнае месца ў нашым жыцці. Давайце вучыць іх клопату пра блізкіх, павазе і смеласці быць сабой», — заклікае Ціханоўская.
Цяпер чытаюць
Расійскія і лукашэнкаўскія спецслужбы на фоне залёту дронаў у Польшчу правялі інфаатаку. Яе зладжанасць дае падставы думаць, што залёт быў спланаваны1616
Каментары