Жыгар з «Белпола» раскрытыкаваў тых, хто прывёў Мельнікаву ў топ апазіцыі. Латушка адказаў

Уладзімір Жыгар кажа, што ў сітуацыі з Мельнікавай «усё проста», там было шмат чырвоных сцяжкоў.

«Той, хто яе прывёў, павінен быў цалкам яе праверыць. Усе вось гэтыя нюансы, што цяпер усплываюць — што муж ездзіў у Беларусь, дзеці [ездзілі ў Беларусь] нешта яшчэ — усё гэта трэба было праверыць тады. Таму што ўсё гэта не тое каб выклікае параною, якая часта бывае ў беларусаў (што тут агент, там агент, хтосьці нешта спытаў — усё, агентура). Гэта сітуацыя, калі ў чалавека вось такое ў сям’і.

Гэта значыць, што ў гэтага чалавека ўжо ёсць месца, на якую сістэма можа ў нейкі момант націснуць. Значыць, гэты чалавек не можа, не павінен падымацца вышэй пэўнага ўзроўню ў іерархіі», — кажа Жыгар. 

Паводле яго слоў, «Белпол» распрацоўваў для Каардынацыйнай рады метадычку з рэкамендацыямі па тэхніцы бяспекі, дзе былі згаданыя падобныя да кейса Мельнікавай выпадкі. Але, як вынікае, гэтыя рэкамендацыі не былі выкананыя. 

На закід Жыгара адгукнулася Нацыянальнае антыкрызіснае ўпраўленне, якой кіруе Павел Латушка. Спачатку прэс-служба НАУ перадала свой адказ выданню «Люстэрка». А калі тыя надрукавалі адказ з урыўкамі, апублікавала яго цалкам на сваіх рэсурсах, падкрэсліўшы, што лічыць важным апублікаваць поўны тэкст.

«Мы высока цэнім эфектыўнасць і мэтанакіраванасць працы такой важнай ініцыятывы для дэмакратычнага руху Беларусі, як BELPOL.

Неаднаразова на ўсіх нашых двухбаковых сустрэчах з партнёрамі і ў публічных камунікацыях, у тым ліку ў замежных СМІ, мы падкрэслівалі, што гэтая ініцыятыва ўносіць значны ўклад у нашу агульную мэту — змену сітуацыі ў Беларусі.

Разам з тым, мы расчараваныя выказваннямі аднаго з прадстаўнікоў BELPOL, які заявіў, што тыя, хто прывёў Анжаліку Мельнікаву, павінны былі яе праверыць.

Адказваючы на гэты тэзіс, хочам адзначыць, што Анжаліка Мельнікава прайшла праверку ініцыятывы «Кіберпартызаны», старшынёй фонду якой яна з’яўлялася.

Адначасова, па нашай ініцыятыве, яна прайшла праверку BYPOL, на базе якога, у тым ліку, была створана арганізацыя BELPOL.

Анжаліка Мельнікава таксама прайшла паліграф, арганізаваны той жа ініцыятывай BYPOL.

Пры атрыманні польскага грамадзянства яна ў абавязковым парадку прайшла праверку Агенцтва ўнутранай бяспекі, Агенцтва разведкі, Пагранічнай службы Польшчы, Агенцтва контрразведкі і МУС Польшчы.

Якія дадатковыя праверкі павінна была правесці каманда НАУ, зыходзячы з вышэйпералічанага? Просім таксама ўлічваць, што НАУ, як і ўсе нашы дэмакратычныя ініцыятывы, з’яўляецца грамадзянскай, а не вайсковай арганізацыяй.

Мы спадзяёмся, што меркаванне спадара Уладзіміра Жыгара з’яўляецца яго асабістым меркаваннем», — піша НАУ.

«Давайце дадзім права спецслужбам Польшчы правесці расследаванне ў межах крымінальнай справы «аб незаконным пазбаўленні волі Анжалікі Мельнікавай» і зрабіць адпаведныя высновы», — дадае прэс-служба. 

Анжаліка Мельнікава, спікерка Каардынацыйнай рады, пакінула тэрыторыю Польшчы і Еўрасаюза 26 лютага 2025 года. Паводле расследавальнікаў, за дзень да вылету яна забраніравала пражыванне ў пяцізоркавым гатэлі на Шры-Ланцы, дзе ўжо бывала раней. З 28 лютага па 7 сакавіка Мельнікава жыла ў тым гатэлі з дзецьмі.

7 сакавіка Мельнікава з дзецьмі паляцела ў Дубай, там ейны след губляецца. 

Паводле «Кіберпартызанаў», у сакавіку з рахунку фонду Мельнікавай былі выведзеныя вялікія сумы грошай, што прызначаліся для «Кіберпартызанаў» і Каардынацыйнай рады — агулам з рахунку вывелі 150 тысяч даляраў.

Пасля гэтага яна кантактавала з паплечнікамі з Каардынацыйнай рады праз відэасувязь, але не праз асабістыя сустрэчы: казала, што хварэе. 25 сакавіка перастала выходзіць на сувязь.

13 сакавіка ейны тэлефон выкарысталі для доступу да файлаў Каардынацыйнай рады — іх спампавалі. 

У маі стала вядома, што Мельнікава магла мець рамантычныя адносіны з мужчынам, які з'яўляецца агентам спецслужбаў Беларусі.

Дзе жанчына знаходзіцца зараз — невядома.

• 9
• 0
• 13
• 6
• 0
• 2
• 0
• 0