Валярына Кустава пра былога мужа: Калі скласці афіцыйныя пералікі ад яго на дзіця, то атрымаецца каля $1 на дзень
Тэлевядучая і паэтка Валярына Кустава рашылася расказаць пра адносіны з былым мужам, артыстам Васілём Дранько-Майсюком.
Валярына піша ў фэйсбуку, што не аматар выносіць прыватныя справы на публіку. Але пасля інтэрв'ю свайго былога мужа ў «Наша Ніве» вырашыла патлумачыць некаторыя моманты (яна дазволіла апублічыць гэты допіс).
«Былы муж адмовіўся агучыць так званы «дыяпазон дапамогі» ад яго, бо калі скласці афіцыйныя пералікі на дзіця, то атрымаецца каля 1 даляра ў дзень за больш чым 5 з паловай гадоў. Гэта з улікам гадоў у шлюбе», — сцвярджае Валярына.
Яна не верыць, што Васіль праз год пасля яе пераехаў у Варшаву, каб быць побач з дзіцём. Былі іншыя прычыны, пераканана Валярына.
«Да слова, дазвол на вываз/эвакуацыю дзіцяці Васіль таксама ўпёрта не даваў. Выстаўляючы свае патрабаванні».
Валярына дзеліцца, што на развод падала «праз аб'юз, жорсткую хлусню, псіхалагічны гвалт і здраду».
«Ніякай рэгулярнай сувязі з малой Васіль не падтрымліваў. Наколькі мне вядома. Зрэшты, мо, і прасіў відэазванок раз на месяц, я ўжо і не памятаю толкам. Бо ў галаве пасля эвакуацыі было зусім іншае (я была шчаслівая, што дзіця ўсё ж атрымалася вывезці (дзякуй Bysol), і ў жаху, як утрымліваць 4 чалавек)», — піша вядучая.
Па словах Валярыны, праз два тыдні пасля нараджэння дачкі былы муж прасіў скласці з яго ўсе абавязкі, і яна пагадзілася.
«І калі, эвакуяваўшыся, я не ведала, да каго звярнуцца, то Васіль адказаў (мы яшчэ тады зрэдчас камунікавалі), што ў мяне шмат калег і сяброў у Варшаве і па свеце — няхай яны мне і дапамагаюць. У прынцыпе, так і атрымалася».
Паўтара года таму Валярына бачылася з Васілём.
«Ён прынёс бэушнага мішку, традыцыйна шмат абяцанняў і фантазій. І вельмі спяшаўся па справах. (…) З месяц таму я прапанавала магчымасць сустрэчы (з малой, у маёй прысутнасці), акурат была важная для малой нагода — чалавек адмовіўся, высоўваючы зноў свае фантазійныя патрабаванні».
Вядучая піша, што былы муж часам пагражае ёй судом. Але яна не супраць расставіць усё на свае месцы.
«У маёй дачкі ёсць цудоўны дзядуля, мой тата, які клапоціцца пра маю дзяўчынку, з самага нараджэння. І ў іх напраўду неймаверная эмацыйная сувязь. Яны вельмі перажываюць адно за аднаго. Мне, шчыра кажучы, усё роўна, хто што кажа пра тое, якая я маці, нават не думаю пра гэта. Бо я проста раблю ўсё, што ў маіх сілах (а часта, што па-за сіламі і магчымасцямі) для свайго дзіцяці. І ведаю, што я найлепшая мама для сваёй дачушкі. Наколькі гэта магчыма тут і цяпер.
Я так стамілася ад усяго, што на мяне навалілася апошнім часам, што гэтыя ўсе высвятленні і суды будуць толькі яшчэ адной кропляй у моры. Але калі былы лічыць, што гэтаму самы час менавіта цяпер — ок. Гэта таксама яго выбар. Мае права».
Для Валярыны і яе сям'і адкрыты збор на «Байсол».
Каментары