Беларусы ўвайшлі ў склад адной з калон, якія ўзялі ўдзел у Маршы незалежнасці ў Варшаве. Традыцыйнае мерапрыемства, якое арганізуюць нацыяналісты, адбылося 11 лістапада, піша Most.
Усяго ў шэсці па польскай сталіцы ў Дзень незалежнасці прынялі ўдзел каля 90 тыс. чалавек. Беларусы прайшлі ў складзе «Міжморскай калоны», у якой аб’ядналіся таксама палякі, украінцы, літоўцы, латышы, эстонцы і іншыя. Арганізатарамі калоны выступілі беларускія нацыяналісты з РУХу і польская арганізацыя Młode Kresy.
Да маршу быў падрыхтаваны банер з цэнтральным лозунгам на лацінцы «Intermarium — Naša moc u adzinstvie!»
Intermarium — гэта ідэя палітычнага і ваеннага саюза краін Цэнтральнай і Усходняй Еўропы, якія імкнуцца да незалежнасці ад уплыву Расіі і Захаду.
Калона выкарыстоўвала лозунгі «Жыве Беларусь», «Niech żyje Polska» («Жыве Польшча»), «Інтэрмарыум — моц і бяспека», «Mińsk-Warszawa — wspólna sprawa» («Мінск-Варшава — агульная справа»), «Слава Палку Каліноўскага».
— Стаўленне да нашай «Міжморскай калоны» было ветлівым і прыязным. Шмат палякаў падыходзіла выказаць сваю падзяку і падтрымку, а таксама зрабіць фотаздымкі на фоне нашага банера. Нам было прыемна разам з палякамі адзначыць іх галоўнае свята. Не трэба забываць, што за незалежнасць Польшчы змагалася нямала беларусаў. Таксама сваім удзелам мы жадалі падзякаваць польскай дзяржаве за прыхільнае стаўленне да нашых суайчыннікаў. Нагадаць польскаму народу, што беларусы супраць крывавых неасавецкіх рэжымаў Лукашэнкі і Пуціна. Ну і канешне выказаць нашую міжморскую пазіцыю, што сапраўдная моц і надзейная бяспека нашых краін будзе магчыма толькі ў будучым палітычным партнёрстве і сяброўстве, — адзначылі ў РУХу.
Каментары