Крамлёўскі дэмограф заявіў аб анамальнай мужчынскай звышсмяротнасці ў Расіі
Старшыня назіральнай рады расійскага Інстытута дэмаграфіі, міграцыі і рэгіянальнага развіцця Юрый Крупноў даў гэтаму арыгінальнае тлумачэнне.
Па словах урадавага дарадцы Юрыя Крупнова, у Расіі цяпер назіраецца вельмі высокая тэндэнцыя смяротнасці ў мужчын узростам ад 25 да 45 гадоў, якая «вышэйшая за паказчыкі Еўропы ў 5-6 разоў».
«У Расіі мужчын узростам да 30 гадоў сапраўды больш, чым жанчын. У нас нараджаецца прыкладна 104 хлопчыкі на 100 дзяўчынак. Але асноўная праблема пачынаецца пасля 25-30 гадоў.
У так званай квітнеючай узроставай групы — ад 25 да 45 гадоў — назіраецца мужчынская звышсмяротнасць, якая ў параўнанні з Еўропай у 5-6 разоў вышэйшая. Гэта катастрафічная анамалія»,
— заявіў Крупноў у інтэрв'ю расійскаму агенцтву «Грамадская служба навін».
Дэмограф адзначыў, што на бліжэйшыя 20—30 гадоў Расіі патрэбна распрацаваць і ажыццявіць «нацыянальны праект па выратаванні мужчын» і што «без структурных зменаў у грамадстве, пераасэнсавання каштоўнасцяў і дзяржаўнай падтрымкі гэтую праблему не вырашыць».
Аднак чыноўнік ні словам не абмовіўся аб уплыве вайны ва Украіне на мужчынскую смяротнасць у Расіі, знайшоўшы анамаліі зусім іншае тлумачэнне.
«Здавалася б, у гэтым узросце [25-45 гадоў] гаварыць пра смяротнасць увогуле не варта. Але ў нас гэта нацыянальная асаблівасць, звязаная з бяздумнымі мадэлямі паводзін мужчын, іх схільнасцю трымаць усё ў сабе і не выказваць праблемы. Да гэтага дадаюцца такія фактары, як злоўжыванне алкаголем і адсутнасць зваротаў па медыцынскую дапамогу», — сцвярджае Крупноў.
Нагадаем, днямі на Круглым стале Камітэта па працы, сацыяльнай палітыцы і справах ветэранаў Расіі выпадкова выдалі статыстыку па колькасці вайскоўцаў, якія зніклі без вестак.
Намесніца міністра абароны Расіі і па сумяшчальніцтве стрыечная пляменніца Пуціна Ганна Цывілёва падчас свайго выступлення заявіла, што сваякі расійскіх вайскоўцаў здалі 48 тысяч тэстаў ДНК для апазнання іх парэшткаў (усе мужчыны, якія заключаюць кантракт з расійскім Мінабароны, здаюць тэсты ДНК. Гэтыя звесткі затым уносяцца ў базу МУС).
У адказ на гэта кіраўнік камітэта Дзярждумы па абароне Андрэй Картаполаў зрабіў Цывілёвай заўвагу і папрасіў «нідзе больш гэтыя лічбы не агучваць», а таксама «прыбраць такую інфармацыю з дакументаў».
Цяпер чытаюць
«Калі ўжо сюды прыляціць украінская ракета!» Вызвалены журналіст Яўген Меркіс расказаў пра шклоўскую калонію10
Каментары
Гэтая смяротнасць існавала і да вайны у расіі. Існавала і існуе яна і ў Беларусі, хаця кулі і не свішчуць.