Амерыканскі сенатар — праціўнік геяў — публічна прызнаўся ў гомасексуалізме
Рэспубліканец Рой Эшбурн нязменна галасаваў супраць абароны правоў секс‑меншасцяў 14 гадоў.
Амерыканскі сенатар‑рэспубліканец Рой Эшбурн, які нязменна галасаваў супраць абароны правоў секс‑меншасцяў, праз 14 гадоў знаходжання на пасадзе публічна прызнаўся, што з’яўляецца гомасексуалістам.
Нечаканае прызнанне прагучала ў эфіры радыёстанцыі KERN ў Каліфорніі — кансерватыўным у гэтым сэнсе штаце, які і прадстаўляе сенатар. Там, у прыватнасці, забароненыя аднаполыя шлюбы.
У сваім інтэрв’ю 55‑гадовы Эшбурн, разведзены бацька чатырох дзяцей, заявіў, што гісторыя яго галасаванняў ў сенаце адлюстроўвае меркаванне выбаршчыкаў, але не яго ўласнае. У прыватнасці, у мінулым годзе ён выступіў супраць дня памяці забітага актывіста за правы геяў Харві Мілка.
Сваю «шчырасць» сенатар патлумачыў патрэбай адказаць на чуткі пра тое, што на днях у Сакрамэнта ён наведаў адзін з начных гей‑клубаў. Гэта адбылося перад тым, як яго затрымалі за кіраванне аўтамабілем у нецвярозым стане.
Рой Эшбурн паведаміў, што не плануе працягваць палітычную ці грамадскую дзейнасць пасля таго, як сёлета скончыцца тэрмін яго паўнамоцтваў на пасадзе сенатара.
Каментары