У Міністэрстве замежных спраў паведамілі, што за выбарамі 26 студзеня будуць назіраць 456 замежных назіральнікаў з 49 краін. У тым ліку запрашэнне было накіравана і Бюро дэмакратычных інстытутаў і правоў чалавека (БДІПЧ) АБСЕ. БДІПЧ пацвердзіла, што іх сапраўды запрашалі, але не тады, калі гэта было трэба.
У арганізацыі заявілі, што ўлады Беларусі накіравалі запрашэнне з прапановай назіраць за выбарамі 26 студзеня са спазненнем.
«Беларусь абвясціла дату прэзідэнцкіх выбараў некалькі месяцаў таму, і ўлады добра разумеюць, што БДІПЧ мае патрэбу ў своечасовым запрашэнні для назірання за ўсімі ключавымі аспектамі выбараў, уключаючы падрыхтоўку да дня выбараў», — паведаміла «Радыё Свабода» Каця Андруш, прэс— сакратарка Бюро дэмакратычных інстытутаў і правоў чалавека.
Такім чынам, паводле яе, сітуацыя застаецца такой, як была вызначаная ў супольнай заяве БДІПЧ і Парламенцкай асамблеі АБСЕ ад 9 студзеня. У ёй арганізацыі выказалі «глыбокае шкадаванне» праз рашэнне ўладаў Беларусі не запрашаць дзяржавы — удзельніцы АБСЕ назіраць за прэзідэнцкімі выбарамі ў краіне 26 студзеня. Гэта, як адзначалася ў заяве, «перашкаджае бесстаронняй і незалежнай ацэнцы выбарчага працэсу».
«Нягледзячы на тое, што БДІПЧ не можа назіраць за гэтымі выбарамі праз адсутнасць своечасовага запрашэння, мы працягваем уважліва сачыць за падзеямі ў Беларусі з усіх пунктаў гледжання, ахопленых нашым мандатам», — падкрэсліла Каця Андруш.
Таксама на заяву МЗС адрэагаваў Офіс Святланы Ціханоўскай, які заклікаў БДІПЧ адхіліць запрашэнне:
«Мы настойліва заклікаем АБСЕ/БДІПЧ не прымаць гэтае запозненае і абмежаванае запрашэнне назіраць за галасаваннем на так званых прэзідэнцкіх выбарах 26 студзеня.
У 1994 годзе ўсе дзяржавы-ўдзельніцы АБСЕ далі БДІПЧ мандат на правядзенне доўгатэрміновага назірання за выбарамі, прызнаючы, што выбары — гэта не аднадзённая падзея. Як ужо заяўляла БДІПЧ, ненакіраванне своечасовага запрашэння на неабмежаваны тэрмін назіраць за так званымі выбарамі 26 студзеня з'яўляецца парушэннем абавязацельстваў Беларусі ў рамках АБСЕ.
Калі падобнае запозненае, абмежаванае па тэрмінах і якое не з'яўляецца сапраўдным запрашэнне назіраць за галасаваннем будзе прынятае, гэта створыць небяспечны прэцэдэнт для ўсяго рэгіёна АБСЕ».
Цяпер чытаюць
«Частку сваякоў я адсеяла». Гамяльчанка, якая жыве ў Адэсе, распавяла пра адаптацыю да абстрэлаў, украінскую мову і свой блог2
Каментары