МАК прызнаў легітымнасць Віктара Лукашэнкі і выбараў у НАК Беларусі
Нацыянальны алімпійскі камітэт Беларусі заявіў, што Міжнародны алімпійскі камітэт прызнаў выбары старэйшага сына Аляксандра Лукашэнкі Віктара на пасаду кіраўніка арганізацыі. «Люстэрка» даведалася ў самога МАК, ці праўда гэта.
«МАК атрымаў поўную справаздачу пра чатырохгадовую выбарную Генеральную асамблею, якая адбылася 15 студзеня 2025 года, у адпаведнасці са статутам НАК Беларусі і Алімпійскай хартыяй. Выбары былі паспяхова арганізаваныя і праводзіліся таемным галасаваннем, уключаючы пасады прэзідэнта і віцэ-прэзідэнта.
Згодна са статутам НАК, перагледжаным у 2021 годзе, прэзідэнт, віцэ-прэзідэнт і члены выканкама не займаюць ніякіх дзяржаўных пасад. Больш за тое, на выбарнай Генеральнай асамблеі НАК прысутнічаў (дыстанцыйна) назіральнік, прызначаны сумесна МАК і еўрапейскімі алімпійскімі камітэтамі (ЕАК), які пацвердзіў вышэйпададзенае.
У сувязі з гэтым выканкам МАК унёс папраўкі ў пастанову ад сакавіка 2021 года такім чынам, што выбары НАК Беларусі ад 15 студзеня 2025 прызнаюцца праведзенымі належным чынам», — сказана ў каментары прэс-службы МАК для «Люстэрка».
Віктар Лукашэнка стаў прэзідэнтам Нацыянальнага алімпійскага камітэта замест свайго бацькі 26 лютага 2021 года. Да гэтага ён амаль два гады выконваў функцыі першага віцэ-прэзідэнта НАК, а прэзідэнтам з 1997 года быў сам Аляксандр Лукашэнка.
Ракіроўка ў 2021-м здарылася неўзабаве пасля таго, як Менск пазбавілі права правядзення чэмпіянату свету ў хакеі, а Міжнародны алімпійскі камітэт увёў санкцыі супраць НАК праз адсутнасць абароны спартсменаў ад дыскрымінацыі.
Праўда, тады МАК не прызнаў выбары і прызначэнне Віктара Лукашэнкі. Кантакты з Беларуссю арганізацыя падтрымлівала праз генеральнага сакратара НАК Ксенію Санковіч.
15 студзеня 2025 года на Генеральнай Асамблеі НАК Беларусі Віктара Лукашэнку пераабралі кіраўніком арганізацыі, а віцэ-прэзідэнтам застаўся Дзмітрый Даўгалёнак. 3 лютага НАК распаўсюдзіў заяву, што МАК прызнаў гэтыя выбары. Акрамя таго, была прынятая пастанова «даць Беларусі доступ да ўсіх праграм па лініі алімпійскай салідарнасці». Мяркуючы па ўсім, гаворка ідзе пра грантавыя выплаты на аперацыйныя выдаткі і працу адміністрацыйнага персаналу.
Цяпер чытаюць
Слова «Унаватуна» значыць «рай». Дзе на Шры-Ланцы адпачывала Мельнікава20
Каментары