Польская паліцыя закрыла справу, заведзеную пасля суіцыду беларуса ў Варшаве
Следства прыйшло да высновы, што 67-гадовага грамадзяніна Беларусі, які ўчыніў самагубства ў бальніцы ў мінулым годзе, ніхто да гэтага не падбухторваў. Пра гэта тэлеканалу «Белсат» паведамілі ў акруговай пракуратуры раёну Прага-Поўнач, пад наглядам якой вёўся разбор справы.
«Паказанні сведкаў, а таксама іншыя сабраныя доказы дазволілі вызначыць, што дзеянне ці бяздзейнасць іншых асобаў не паспрыяла смерці ахвяры. Ніхто не падбухторваў яго да самагубства і не дапамагаў яму ў гэтым», — паведаміў «Белсату» прэс-сакратар акруговай пракуратуры раёна Прага-Поўнач Норберт Валіньскі.
Ён сказаў, што справу, якая расследавалася паводле артыкула аб давядзенні да суіцыду, закрылі 18 снежня:
«Вядзенне было завершанае ў звязку з адсутнасцю складу злачынства».
Ці высветліла следства матыў мужчыны, Валіньскі не ўдакладніў.
Здарэнне адбылося 11 верасня 2024 года ў шпіталі на вуліцы Кандратовіча ў варшаўскім раёне Брудна. Беларус, які там лекаваўся, скокнуў з акна палаты на шостым паверсе.
У бальніцы «Белсату» тады казалі, што мужчына паводзіў сябе адэкватна і нічога не прарочыла бяды:
«Аніякіх складанасцяў з пацыентам не было, ён быў у добрым кантакце з персаналам. Мы чакалі, што яго выпішуць максімум праз некалькі дзён. Ягоны дыягназ не быў цяжкім і назіраўся выразны прагрэс у лекаванні ў правільным кірунку».
Гібель беларуса ў бальніцы ў Варшаве расследуюць як давядзенне да суіцыду
У Варшаве беларус загінуў, скокнуўшы з шостага паверха бальніцы
«Гэта мяне зламала». Беларус, у якога ў Гданьску спалілі дом-прычэп, спрабаваў скончыць жыццё самагубствам
У Грузіі за паўтара года сем грамадзян Беларусі скончылі жыццё самагубствам
У Лепелі затрымалі паляка, які нібыта здабыў дакументы вучэнняў «Захад-2025»10
Каментары