Прысуд асуджанаму на 11 гадоў ксяндзу Акалатовічу пакінулі без зменаў
64-гадовага хворага святарa адправяць у калонію ўзмоцненага рэжыму. Акрамя таго, канфіскавалі іконы і патрабуюць выплату вялікай сумы.
У Вярхоўным судзе Беларусі 1 красавіка разглядзелі скаргу на рашэнне Мінскага абласнога суда па справе каталіцкага святара Генрыха Акалатовіча. Настаяцель парафіі ў Валожыне быў асуджаны па абвінавачванні ў «здрадзе дзяржаве» на 11 гадоў зняволення, але не прызнаў сябе вінаватым і абскардзіў прысуд, піша katolik.life.
Вернікі даведаліся пра вынік разгляду справы — Вярхоўны суд адмовіў у задавальненні скаргі ксяндза Акалатовіча і пакінуў без зменаў рашэнне абласнога суда.
Акрамя вялікага тэрміну святару быў прысуджаны буйны штраф, таксама патрабуюць выплату яшчэ некалькіх сум, у цэлым гэта эквівалентна прыблізна 1 мільёну еўра. Але вернікам дакладна невядомы прысуд, таму яны не разумеюць, на якой падставе ўзнікла такая захмарная сума.
Паводле звестак, што дайшлі да вернікаў, большая частка гэтай сумы не выплачана. Часткова яе пагасілі за кошт канфіскаваных падчас ператрусу грошай святара і парафіі. Таксама вернікам вядома, што КДБ канфіскаваў не толькі грошы, але і іконы, некаторыя з якіх, у тым ліку адна старадаўняя, не належалі ксяндзу Генрыху, а толькі захоўваліся ў яго.
«Зберажэнні, якія яму належалі, ён збіраў сабе на старасць. Бо вядома, што ў святароў няма працоўнага стажу, таму яны могуць разлічваць толькі на самую мінімальную пенсію, на якую пражыць немагчыма. А цяпер гэтыя грошы забралі і яшчэ патрабуюць захмарную суму. Спадзяюцца, што Ватыкан заплаціць? Няўжо гэта насамрэч торг за грошы?» — задаюцца пытаннем вернікі.
Такім чынам, рашэнне суда ўступае ў сілу, і ў хуткім часе святара павінны накіраваць у калонію ўзмоцненага рэжыму.
Хто такі Міхаіл Мяховіч — сілавік, які вядзе канал ГУБАЗіКа і адказвае за прабіў людзей20
Каментары