«Інвестыцыі ў штучны інтэлект скончацца халодным душам». Прагноз IT-бізнэсмена Хамянка

Айцішнік і бізнэсмен, былы кіраўнік кампаніі Rozum Robotics Віктар Хамянок напісаў пост у фэйсбуку, які назваў «ШІ — бурбалка ці не?», нагодай для напісання якога стала інфармацыя аб тым, што стартап Cursor змог прыцягнуць 9 мільярдаў даляраў інвестыцый.

«Стрыманае захапленне змешваецца з шчырай зайздрасцю»,

— іранічна прызнаецца Хамянок і тлумачыць для тых, хто не ведае, што за Cursor:

«Гэта такая «чарадзейная палачка», якой ты «чалавечым голасам» гаворыш, які праграмны прадукт хочаш распрацаваць, пасля чаго выскокваюць «два з ларца» і за паўгадзіны праграмуюць увесь код прадукту замест цябе. Увесь. Замест цябе. За паўгадзіны. За 20 баксаў у месяц».

Павялічыць

Хамянок прызнаецца, што быў упэўнены, што 9 мільярдаў — «гэта капейкі», пакуль не даведаўся, што ў кампаніі працуе ўсяго 20 чалавек.

Калі стаў разбірацца, як такое магчыма, то зразумеў, што гэта нескладанае тэхнічнае рашэнне, якое могуць паўтарыць не толькі гіганты, але і іншыя невялікія каманды.

Па яго меркаванні, такія інвестыцыі ў штучны інтэлект нерацыянальныя:

«Так, зразумела, што ідзе вайна за долю рынку. Зразумела, што «хто раней устаў, таго і тапкі». Але 9, прабачце, шалёных мільярдаў за набор тэкставых промптаў (я трохі перабольшваю), якія можна напісаць аднаму?»

«Маё меркаванне: з пункту гледжання эканомікі, усё гэта гіганцкая бурбалка, якая хутка з вялікім грукатам лопне. Не можа не лопнуць!» — даводзіць Хамянок і праводзіць паралелі з «датком-бурбалкай» (dot-com bubble) — інвестыцыйным бумам канца 1990-х, калі ў інтэрнэт-кампаніі, дамены якіх заканчваліся на «.com», масава ўкладваліся грошы, часта без усялякай фінансавай логікі. Многія з гэтых кампаній не мелі ні ўстойлівага прадукту, ні прыбытку, але ацэньваліся ў мільярды. У 2000 годзе бурбалка лопнула, і большасць такіх стартапаў збанкрутавала. Як піша Хамянок:

«Усё з дакладнасцю да дэталяў супадае з бурбалкай даткомаў на пачатку 2000-х, калі мне, маладому праграмісту, у суперкрутой канторы аднойчы выдалі фінальны заробак мэбляй і камп’ютарам».

Хамянок падкрэслівае: ён не супраць штучнага інтэлекту, наадварот, яго прыхільнік:

«Я вялікі фанат і апалагет ШІ і як тэхналогіі, і як драйверу эканамічнага росту, і як я***чай магіі, якая незразумела як, але ўсё ж такі працуе».

Аднак як інвестар ён глядзіць на тое, што адбываецца, інакш:

«Як інвестыцыі — гэта ўсё вялікая істэрыя (…), якая (…) не можа скончыцца нічым іншым, акрамя як халодным душам для інвестараў на працягу бліжэйшай пары гадоў».

«Запомніце гэты «твіт». Потым будзеце тыкаць мяне ў яго носам. А я пакуль пайшоў думаць, як на гэтай істэрыі яшчэ паспець крыху зарабіць», — завяршае свой пост бізнэсмен.

• 18
• 1
• 4
• 6
• 0
• 0
• 1
• 2