«Inviestycyi ŭ štučny intelekt skončacca chałodnym dušam». Prahnoz IT-biznesmiena Chamianka

Ajcišnik i biznesmien, były kiraŭnik kampanii Rozum Robotics Viktar Chamianok napisaŭ post u fejsbuku, jaki nazvaŭ «ŠI — burbałka ci nie?», nahodaj dla napisańnia jakoha stała infarmacyja ab tym, što startap Cursor zmoh pryciahnuć 9 miljardaŭ dalaraŭ inviestycyj.

«Strymanaje zachapleńnie źmiešvajecca z ščyraj zajzdraściu»,

— iranična pryznajecca Chamianok i tłumačyć dla tych, chto nie viedaje, što za Cursor:

«Heta takaja «čaradziejnaja pałačka», jakoj ty «čałaviečym hołasam» havoryš, jaki prahramny pradukt chočaš raspracavać, paśla čaho vyskokvajuć «dva z łarca» i za paŭhadziny prahramujuć uvieś kod praduktu zamiest ciabie. Uvieś. Zamiest ciabie. Za paŭhadziny. Za 20 baksaŭ u miesiac».

Pavialičyć

Chamienok pryznajecca, što byŭ upeŭnieny, što 9 miljardaŭ — «heta kapiejki», pakul nie daviedaŭsia, što ŭ kampanii pracuje ŭsiaho 20 čałaviek.

Kali staŭ raźbiracca, jak takoje mahčyma, to zrazumieŭ, što heta nieskładanaje techničnaje rašeńnie, jakoje mohuć paŭtaryć nie tolki hihanty, ale i inšyja nievialikija kamandy.

Pa jaho mierkavańni, takija inviestycyi ŭ štučny intelekt nieracyjanalnyja:

«Tak, zrazumieła, što idzie vajna za dolu rynku. Zrazumieła, što «chto raniej ustaŭ, taho i tapki». Ale 9, prabačcie, šalonych miljardaŭ za nabor tekstavych promptaŭ (ja trochi pierabolšvaju), jakija možna napisać adnamu?»

«Majo mierkavańnie: z punktu hledžańnia ekanomiki, usio heta hihanckaja burbałka, jakaja chutka ź vialikim hrukatam łopnie. Nie moža nie łopnuć!» — davodzić Chamianok i pravodzić paraleli z «datkom-burbałkaj» (dot-com bubble) — inviestycyjnym bumam kanca 1990-ch, kali ŭ internet-kampanii, damieny jakich zakančvalisia na «.com», masava ŭkładvalisia hrošy, časta biez usialakaj finansavaj łohiki. Mnohija z hetych kampanij nie mieli ni ŭstojlivaha praduktu, ni prybytku, ale aceńvalisia ŭ miljardy. U 2000 hodzie burbałka łopnuła, i bolšaść takich startapaŭ zbankrutavała. Jak piša Chamianok:

«Usio z dakładnaściu da detalaŭ supadaje z burbałkaj datkomaŭ na pačatku 2000-ch, kali mnie, maładomu prahramistu, u supierkrutoj kantory adnojčy vydali finalny zarobak meblaj i kampjutaram».

Chamianok padkreślivaje: jon nie suprać štučnaha intelektu, naadvarot, jaho prychilnik:

«Ja vialiki fanat i apałahiet ŠI i jak technałohii, i jak drajvieru ekanamičnaha rostu, i jak ja***čaj mahii, jakaja niezrazumieła jak, ale ŭsio ž taki pracuje».

Adnak jak inviestar jon hladzić na toje, što adbyvajecca, inakš:

«Jak inviestycyi — heta ŭsio vialikaja isteryja (…), jakaja (…) nie moža skončycca ničym inšym, akramia jak chałodnym dušam dla inviestaraŭ na praciahu bližejšaj pary hadoŭ».

«Zapomnicie hety «tvit». Potym budziecie tykać mianie ŭ jaho nosam. A ja pakul pajšoŭ dumać, jak na hetaj isteryi jašče paśpieć krychu zarabić», — zaviaršaje svoj post biznesmien.

• 13
• 1
• 0
• 5
• 0
• 0
• 1
• 0