Упершыню за чатыры гады Белстат апублікаваў звесткі аб нараджальнасці і смяротнасці. Даныя не радуюць
У Беларусі з 2020 года не публікавалі афіцыйную інфармацыю аб колькасці нараджэнняў і смерцяў. У красавіку 2025-га на сайце Нацыянальнага статыстычнага камітэта з'явіліся дэмаграфічныя даныя — упершыню за доўгі час. Праўда, лічбы сталі публікаваць адразу за 2024-ы, прапусціўшы чатыры папярэднія гады, піша «Люстэрка».
Нараджальнасць
Па афіцыйных даных, у 2024 годзе ў Беларусі нарадзілася 58938 дзяцей, паказчык нараджальнасці — 6,5 ‰ (гэта значок праміле паказвае колькасць нараджэнняў на тысячу чалавек).
Гэтая лічба практычна супадае з той, што раней публікавала «Люстэрка», грунтуючыся на ўнутраных дакументах Міністэрства аховы здароўя, атрыманых пры дапамозе арганізацыі BELPOL.
Пры гэтым інфармацыю за 2020, 2021, 2022 і 2023 гады Белстат па невядомай прычыне «прапусціў» (аднак яна таксама вядомая з уцечак Міністэрства аховы здароўя).
Ніжэй — абноўленыя графікі, якія паказваюць, як мянялася колькасць дзяцей, якія нарадзіліся на працягу апошніх гадоў (за «прапушчаныя» Белстатам гады паказаныя даныя з дакументаў Міністэрства аховы здароўя).
Колькасць нараджэнняў (2012—2024)
Колькасць нараджэнняў (1990—2024)
Нагадаем, значэнне нараджальнасці за 2024 год — гэта гістарычны антырэкорд. Колькасць дзяцей, якія нарадзіліся ў Беларусі, зноў стала самай нізкай за ўсю гісторыю статыстычнай справаздачнасці ў Беларусі — з 1950 года.
Колькасць нараджэнняў (1950—2024)
Смяротнасць
Яшчэ адна лічба, якую не публікавалі некалькі гадоў, — колькасць памерлых людзей. Па свежых даных Белстата, у 2024 годзе яна склала 115 124 чалавекі, паказчык смяротнасці — 12,6 ‰ (аналагічна лічыцца ў праміле і паказвае колькасць смерцяў на тысячу чалавек).
Значэнні з 2020 па 2023 год статыстычнае ведамства таксама па невядомай прычыне прапусціла. «Кіберпартызаны» на аснове даных уцечак прыводзілі такія лічбы памерлых у Беларусі па гадах: у 2020-м — 149 339, у 2021-м — 177 825, у 2022-м — 130 064, у 2023-м — 119 823.
З улікам гэтых даных сітуацыя са смерцямі па гадах выглядае так:
Колькасць смерцяў (2012—2024)
Колькасць смерцяў (1990—2024)
Колькасць смерцяў (1950—2024)
Таксама Белстат апублікаваў значэнне натуральнага прыросту (а дакладней, змяншэння) насельніцтва Беларусі за 2024 год — мінус 56 186 чалавек. Гэтая лічба паказвае рознасць паміж нараджальнасцю і смяротнасцю, яна не ўлічвае міграцыйныя працэсы.
Па даных статыстычнага ведамства, ва ўзросце да года памерлі 173 дзіцяці, паказчык дзіцячай смяротнасці — 2,9 ‰.
Цяпер чытаюць
Навуковец распавёў пра геалагічныя загадкі Беларусі: іртуць з зямлі і кратар ад падзення метэарыта, які знішчыў усё жывое ў радыусе тысяч кіламетраў77
Каментары