Вялікі тэатр оперы і балета Беларусі ў сярэдзіне жніўня плануе гастролі ў акупаваны Крым. Сярод арганізатараў паездкі — намеснік генеральнага дырэктара Вадзім Мартысевіч. Як стала вядома выданню «Люстэрка», мужчына раней працаваў у сілавых органах, ён падпалкоўнік міліцыі.
Паводле звестак Belpol, Вадзіму Мартысевічу 52 гады, ён родам з аграгарадка Здзітава Бярозаўскага раёна. Сваю кар'еру мужчына пачаў у 1997 годзе як участковы інспектар міліцыі Кастрычніцкага РУУС Мінска. У 2000-м Мартысевіч стаў інспектарам па прафесійнай падрыхтоўцы кадраў у тым жа самым РУУС. Так ён прапрацаваў чатыры гады.
У 2004-м сілавік уладкаваўся ў аркестр ГУУС Мінгарвыканкама. Паводле звестак Belpol, Мартысевіч быў там дырыжорам.
Ягоны знаёмы Андрэй (імя зменена) успамінае тую працу інакш.
«Можа, на паперы так напісалі, але ён займаўся менавіта арганізацыяй выступаў і адміністрацыйнай працай, — расказвае мужчына. — Ён дакладна не быў у аркестры дырыжорам, я такога не памятаю. У самадзейнасці ў міліцыі ўдзельнічаў (ужо забыўся, з чым менавіта выступаў), але на гэтым усё. Папярэднюю начальніцу адправілі на пенсію, і ён нейкім чынам атрымаў яе месца. Думаю, што проста кудысьці ў ГУУС звярнуўся, прапанаваў сваю кандыдатуру, і яго паставілі».
У 2016 годзе Мартысевіч пайшоў з аркестра і ўзначаліў аддзел ідэалагічнай работы і кадравага забеспячэння Спецліцэя МУС. Адтуль у снежні таго ж года звольніўся па пагадненні бакоў і больш у сілавыя структуры не вяртаўся.
Пайшоў у адстаўку Мартысевіч у званні падпалкоўніка. Пасля гэтага, паводле інфармацыі Belpol на лета 2021 года, мужчына працаваў начальнікам участка ў піваварнай кампаніі «Крыніца». Пра яго далейшую кар'еру аб'яднанню нічога не вядома.
У Вялікі тэатр оперы і балета Мартысевіч, верагодна, прыйшоў у красавіку — маі 2023-га. Так, яго імя з'яўляецца на сайце тэатра ў спісе камісіі па супрацьдзеянні карупцыі ў маі 2023 года. На захаванай копіі той жа старонкі за сакавік 2023-га мужчыны ў спісе яшчэ няма.
З Мартысевічам Андрэй даўно не меў зносін. Але кажа, што ў часы працы ў аркестры ГУУС мужчына рабіў уражанне «нядрэннага чалавека». Праўда, даведаўшыся, што той займае пасаду намесніка дырэктара Вялікага тэатра, суразмоўца «Люстэрка» вельмі здзівіўся:
«Магу толькі адным словам — ён жа мент. Разумееце, Вялікі тэатр — гэта ж самая галоўная з усіх пляцовак. Хто ім павінен кіраваць? Як мінімум чалавек з профільнай адукацыяй. Не абавязкова музыка, ён можа быць балетмайстрам, яшчэ кімсьці. А Мартысевіч прасоўвае «адміністратыўку», яму не важная творчасць, яму важна, каб усё было «чотка». Нават у вашым артыкуле пра гастролі ў Крым ён кажа, што ніякіх праблем, гэтыя не паедуць, іншых набяром. Вось такі прынцып, я так разумею».
Цяпер чытаюць
«Быў галодны, як з Асвенціма, не еў ні мяса, ні гародніны». Што вядома пра смерць бабруйскага журналіста, на якога завялі крымінальную справу ў Польшчы1919
Каментары