Спрасцілі правілы будаўніцтва аб'ектаў, прызнаных важнымі для рэгіёнаў
Цяпер мясцовыя органы ўлады — аблвыканкамы і Мінгарвыканкам — могуць, па ўзгадненні з урадам, самастойна вызначаць асаблівасці праектавання і будаўніцтва першачарговых для іх аб’ектаў. Адпаведны ўказ падпісаў Аляксандр Лукашэнка.
Напрыклад, мясцовым органам улады дазволена адначасова распрацоўваць праектную дакументацыю і весці будаўнічыя работы, а таксама сумяшчаць этапы выбару месца для будаўніцтва, даследчыя работы і распрацоўку праекта.
Акрамя таго, указ дазваляе не кампенсаваць страты сельскай і лясной гаспадаркі пры выдзяленні зямлі пад будаўніцтва, а знос зялёных насаджэнняў можна ўзгадняць без выплаты кампенсацый.
Дазваляецца таксама закупляць усё неабходнае для будаўніцтва (праекты, тавары, работы ці паслугі) у аднаго пастаўшчыка без правядзення конкурсаў.
Мясцовыя саветы дэпутатаў змогуць самі вырашаць, ці патрэбныя грамадскія абмеркаванні па канкрэтных праектах.
Таксама ўказ уводзіць персанальную адказнасць чыноўнікаў за неналежнае выкананне гэтых новых паўнамоцтваў.
Каментары