«Адмыла кватэру, а яна кажа: выязджай». Беларуска зняла аднапакаёўку ў Мінску, але гаспадыня ўбачыла «камуналку» і перадумала
Таццяна знайшла аднапакаёвую кватэру ў адной з тэматычных груп у месенджары. Уласніца здавала яе з мэбляй за $320 па курсе на праспекце Газеты «Звязда».
Адзіны нюанс, які адзначыла для сябе Таццяна, — у кватэры ніхто не прапісаны, таму тарыфы на «камуналку» абяцалі быць крыху вышэйшымі, піша Onliner.by.
— З уласніцай аднушкі мы адразу вусна абмеркавалі ўмовы пра тое, што я буду плаціць спажытае па тарыфе прапісанага, яна — астатнюю розніцу. Дамову арэнды на год заключылі даволі хутка, а ўжо 15 чэрвеня я заехала ў кватэру.
Па словах Таццяны, жыллё доўгі час пуставала, таму ёй прыйшлося заўважна папрацаваць над тым, каб прывесці кватэру ў парадак.
— Я адмывала яе даволі доўга: там было вельмі шмат пылу і бруду, — працягвае жанчына. — Уласніца пры гэтым ведала пра стан кватэры, але рабіць уборку там не планавала, казала: не хочаш, знайду іншых ахвотных. Пры выбары кватэры для мяне быў важны гэты раён, таму я вырашыла пайсці на гэтыя ўмовы і згадзілася сама прывесці яе ў парадак.
Праз крыху больш за два тыдні пасля засялення ўласніца кватэры прыйшла па аплату і, па словах Таццяны, выставіла новыя ўмовы.
«Кажа: альбо ты будзеш поўнасцю аплачваць «камуналку», альбо выязджай», — успамінае беларуска. — Адзін з яе аргументаў — вялікія выдаткі вады: маўляў, яна не разлічвала, што прыйдзецца так шмат плаціць. Па яе словах, за месяц выйшла тры кубы халоднай і шэсць гарачай вады, — кажа Таццяна. — Я здзіўлялася, бо не планавала плаціць за «камуналку» звыш нормы. Пры гэтым шукаць новую кватэру ў кароткія тэрміны таксама не хацела.
Па словах жанчыны, уласніца патрабавала вызваліць кватэру да 16 жніўня, спасылаючыся на тое, што аднушка будзе выстаўлена на продаж.
— Па вялікім рахунку, я не адмаўлялася плаціць, але папярэдзіла, што далей пагляджу, якія сумы будуць у жыроўках, а пасля канчаткова прыму рашэнне. Яна не стала мяне слухаць і папрасіла з’ехаць. Мне здаецца, гэта проста прычыны, каб здаць гэтую кватэру даражэй: я ж адмыла яе і прывяла ў парадак.
«Ці можа адзін чалавек траціць столькі вады і электраэнергіі?»» Адказ уласніцы
— Так, у нас з Таццянай узнікла непрыемная сітуацыя, — тлумачыць уласніца кватэры. — Мы дамовіліся, што я буду даплачваць розніцу за ваду і электрычнасць. Я ўпершыню здаю жыллё, таму пацікавілася ў суседкі і сябровак, якія жывуць адны, колькі ім абыходзіцца «камуналка». На чалавека па нормах у месяц ідзе адзін-два кубы вады і дзесьці сто кілават электраэнергіі. У яе ж за месяц выйшла 10 кубоў вады і дзвесце кілават электраэнергіі! Гэта нейкія неймаверныя лічбы, я на гэта не разлічвала. Акрамя таго, пры засяленні Таццяна казала, што да яе ў госці з Жлобіна будзе прыязджаць дачка з маленькім дзіцем, але, відаць, яна там не госціць, а жыве. Я не планавала здаваць кватэру сям’і з дзецьмі, таму, калі ўсё гэта высветлілася, папрасіла яе выехаць.
Па словах пенсіянеркі, Таццяна пры засяленні сапраўды згадзілася прыбраць кватэру: у ёй паўгода ніхто не жыў, таму яе патрабавалася асвяжыць.
— Я адразу сказала: мне 79 гадоў, я прыбіраць там не буду. Клінінг таксама аплачваць не планую. Усё, што магла, зрабіла: павесiла новыя фіранкі і карнізы. Кажу: абыходзьце кватэру яшчэ раз і паглядзiце, ці пасуюць вам такія ўмовы. Таццяна згадзілася, якія пытанні да мяне могуць быць? — падсумавала пенсіянерка.
Цяпер чытаюць
Памятаеце фота з мускулістым беларусам, які ў 2020-м ішоў у счэпцы з амапаўцам? Цяпер ён здымаецца ў кіно ў Англіі1
Каментары