Звольнілі начальніцу медчасці калоніі Бабруйска — яе абвінавачваў блогер Ермашук

Чуткі пра тое, што начальніца медыцынскай часці бабруйскай калоніі №2 звольненая з пасады, хадзілі яшчэ ў пачатку гэтага года. Цяпер іх пацвердзіў зняволены, які нядаўна выйшаў на свабоду.

«З зоны выйшаў чалавек, з якім я перасякаўся там, і пацвердзіў інфармацыю пра Ласкаўнёву, — падзяліўся з «Нашай Нівай» блогер Вадзім Ермашук.

Чытайце таксама:«Адмываў гаўно з унітазаў, мы там як самыя кончаныя». Блогер Вадзім Vadimati Ермашук — пра тое, як жыў у калоніі ў «нізкім статусе»

«Як ён мне сказаў, на звальненне Ласкаўнёвай у тым ліку паўплывалі мае інтэрв’ю для СМІ, дзе я расказваў пра жорсткае абыходжанне з людзьмі ў «нізкім статусе», а таксама пра абыякавасць медыкаў. Яшчэ ў 2021-м, да затрымання, я пайшоў паказаць свае радзімкі анколагам — павінен быў выдаліць іх, абследаваць, але мяне пасадзілі. На зоне мне стала вельмі дрэнна, і я прасіў Ласкаўнёву праверыць маю радзімку. Усё, што я чуў у адказ: «Ты не ў санаторыі, ты не ў дзіцячым лагеры, ты ведаў, на што ідзеш і куды». Я даводзіў ёй, што яна ж доктар і давала клятву Гіпакрата, але Ласкаўнёва мне тады адказала, што яна найперш афіцэр, а потым ужо медык».

Чытайце таксама: «Мы для іх — мяса». Палітвязень выйшаў з меланомай, ён ускладае віну на начальніцу санчасці і прымусовае галенне галавы

Павялічыць

У змаганне за Вадзіма, пакуль ён быў за кратамі, уключылася яго сям’я, пачала актыўна пісаць лісты з просьбай праверыць яго здароўе — на адрас начальства калоніі і ў пракуратуру.

«Але яны адпісалі маёй цётцы, што ўсё з маім здароўем нармальна, хаця ў мяне на той момант была анкалогія, і яны маглі на ранняй стадыі гэта знайсці. Мала таго, за лісты маіх сваякоў мяне яшчэ і прысароміла незадаволеная Ласкаўнёва: «Што там твае скардзяцца, што ты там нагаварыў? Паглядзі, як ты добра выглядаеш, тут яшчэ і горш людзі выглядаюць, а ў цябе ўсё нармальна». А мне было вельмі дрэнна, я згасаў».

Павялічыць

Маёр унутранай службы Дар’я Ласкаўнева — ураджэнка горада Нікель Мурманскай вобласці Расіі. Грамадзянства Беларусі атрымала ў 2009 годзе. Жанчына паступіла на службу ў 2010-м на пасаду доктара-тэрапэўта, паведамлялі ў «Белполе». За сем гадоў з лейтэнанта жанчына даслужылася да маёра ўнутранай службы. Яе муж — таксама частка пенітэцыярнай сістэмы: прынамсі, раней працаваў у выхаваўчай калоніі №2 Бабруйска, дзе ўтрымліваюцца непаўналетнія злачынцы.

Павялічыць

«У калоніях, канечне, працуюць добрыя медыкі, але такіх адзінкі. А праз такіх, як Ласкаўнёва, людзі трацяць здароўе — я вось выйшаў са злаякаснай меланомай 3-й стадыі — і паміраюць», — не хавае абурэння Вадзім.

Раней пра абуральнае стаўленне начальніцы медчасці да людзей дадаткова расказваў экс-палітвязень Алег Кулеша: «Гэтая жанчына — вялікая прыхільніца Лукашэнкі і выключная садыстка».

У бабруйскай калоніі звальненне Дар’і Ласкаўнёвай «Нашай Ніве» наўпрост не пацвердзілі, прапанаваўшы званіць ёй асабіста. Па нумары, зарэгістраваным на яе імя, дазваніцца не атрымалася: абанент штораз скідае званок.

• 12
• 0
• 3
• 0
• 0
• 0
• 7
• 0