Лёгкае порна беларускай палітыкі
Эрэкцыя ёсць, але без аргазмаў...
Лёгкае порна беларускай палітыкі
Эрэкцыя ёсць, але без аргазмаў
Я скончаны палітолаг, таму завяду сабе сшытак
І буду запісваць туды палітыкі нашай маразмы
Не, крытыкаў і без мяне хапае
Таму запішуся таксама ў кандыдаты
Буду сядзець у эфіры «Белсата»
На шоу «Перад выбарам» чарговым этапе
Буду казаць пра стратэгіі перамогі,
Што я найлепш падыходжу, каб стаць адзіным
І цераз слова буду прыгадваць Бога,
Бы ён у мяне ў камандзе разам з Францыскам Скарынам
Буду трасці праграмай, бы мне яе напісалі
Кругман разам Нобелем і Аркуш разам з Вялесам
Яшчэ ажанюся, жывот нарашчу, каб фоткі лепш выглядалі
Сына назаву Алесем, дачку — Алесяй
Ствару сабе сайт і ў Фэйсбуку ўсіх заспамлю
Буду найбольш прасунутым кандыдатам у інтэрнэце
Буду ўжываць стратэгію перамогі штабу Абамы
Недарэмна ж вучылі на семінарах пра сеціва
Прыдумаю лагатып, аватары намалюю,
Уступлю ў БНФ, бо кожны там пабываць павінен
А лепей уласную партыю зарэгіструю
Чым больш вагі, тым шанцаў болей стаць адзіным
Зважайце, я новы твар у беларускай палітыцы
Адукаваны, з воляй да ўлады, таму пацясніцеся
Ой, пачакайце… Улады могуць пяць год яшчэ весяліцца
Мне толькі нядаўна стукнула трыццаць
* * *
Андрусь Храпавіцкі – кампутарнік, інтэрнэт-выдавец. Жыве між Глыбокім і Вільняй.
Каментары