Абняць і плакаць: Кіраўнік Мінсельгасхарчу не лічыць цэны ў крамах высокімі
Міністр Русы ўгледзеў у магазінах мяса па 12 тыс. і памідоры па 8 тыс.
Міністр сельскай гаспадаркі і харчавання Беларусі Міхаіл Русы не лічыць цэны ў беларускіх магазінах высокімі. «Не лічу нашы цэны высокімі, —заявіў ён журналістам у Мінску 19 мая. — Пакажыце мне краіну вакол Беларусі, дзе вы можаце купіць, напрыклад, мяса ў магазіне за 12 тысяч? Адпускная цана нашых памідораў, напрыклад, 8 тысяч рублёў за кілаграм».
Пры гэтым, адказваючы на ўдакладняючае пытанне БелаПАН, міністр прызнаў, што дзяржава закупляе ў насельніцтва сельгаспрадукцыю па значна больш нізкіх цэнах, чым прадае яе. Русы не выключыў, што дзяржава будзе ўзнімаць закупныя цэны, аднак адмовіўся назваць тэрміны, калі гэта можа адбыцца.
Міністр таксама зазначыў: імпарт асобных харчовых груп скарачаецца ў сувязі з тым, што «па цэлым шэрагу кірункаў мы яго замяшчаем».
На пытанне пра тое, як падзенне рубля паўплывае на працу прадпрыемстваў сельскагаспадарчай галіны, Русы зазначыў:
«Дык не так моцна рубель беларускі і ўпаў».
Варта зазначыць, што, толькі паводле звестак Белстата, з пачатку гэтага года спажывецкія цэны на тавары і паслугі ў Беларусі ўзраслі на 10,9%. У прыватнасці, цэны на харчовыя тавары ўзраслі на 12,2%. Па гэтым паказчыку Беларусь апярэдзіла Расію, Украіну і Казахстан.
Каментары