Акты вандалізму адбываюцца на Гарадзеншчыне не ўпершыню.
Невядомыя вывярнулі зь зямлі пяць помнікаў вайскоўцаў‑мусульман часоў першай усясьветнай вайны. Адну надмагільную пліту разьбілі.
Мусульманскія могілкі (у Слоніме іх называюць татарскімі) знаходзяцца прыкладна за пяць кілямэтраў ад гораду, у лесе. Учора імам‑старшыня аб’яднаньня слонімскіх мусульман Сулейман Байрашэўскі вярнуўся з паломніцтва ў Мэку, і прыхаджане адразу паведамілі яму непрыемную навіну.
(Байрашэўскі:) «Шостага студзеня заўважылі, што пяць помнікаў павалены і шосты разьбіты. Убачылі гэта, калі хавалі аднаго з мусульман. Але я быў на могілках яшчэ ў лістападзе і сьнежні – усё выглядала нармальна».
Са слоў Байрашэўскага, вывярнулі помнікі вайскоўцаў‑мусульман першай усясьветнай вайны, якія служылі ў царскім войску. Помнікі былі пастаўлены ў 20‑я гады мінулага стагодзьдзя, таму надпісы на іх зроблены па‑польску (тады Заходняя Беларусь уваходзіла ў склад Польшчы).
Сулейман Байрашэўскі паведаміў, што зьвернецца з заявай у міліцыю. Паводле яго, мусульманскім могілкам у Слоніме каля 300 гадоў і вернікі пасьлядоўна даглядаюць іх.
Слонімскі журналіст і краязнаўца Сяргей Чыгрын распавядае, што вандалы на гэтых могілках учыняюць шкоду ўжо ня першы раз.
Чыгрын: «Некалькі гадоў таму абмалявалі мячэт у Слоніме. А яшчэ ў Слоніме пару гадоў таму забілі маладых хлопцаў і закапалі на гэтых мусульманскіх могілках, якраз недалёка ад тых магіл, зь якіх нехта цяпер пазьдзекаваўся».
Нагадаю: акты вандалізму на Гарадзеншчыне адбываюцца не ўпершыню. Некалькі гадоў таму на гарадзенскіх вайсковых могілках нехта пазьбіваў крыжы на магілах польскіх вайскоўцаў. Яшчэ ў 50‑я гады на месцы старых габрэйскіх могілак збудавалі гарадзкі стадыён, а пазьней, падчас яго рэканструкцыі, выкапаныя парэшткі вывозілі на гарадзкі сьметнік.
Здымак Радыё Свабода>.
Цяпер чытаюць
Як у галечы співалася радня Лукашэнкі? Малавядомыя факты25
Каментары