Ажубаліс: з Лукашэнкам Еўропа за стол перамоваў не сядзе, пакуль не будуць вызваленыя палітвязні
Балтыйскія і Паўночныя краіны прытрымліваюцца думкі, што публічныя прапановы прэзідэнта Беларусі Аляксандр Лукашэнка сесці за стол перамоваў павінны быць разгледжаны толькі пасля таго, як яго рэжым адпусціць на волю ўсіх палітычных зняволеных, у аўторак заявіў літоўскі міністр замежных спраў Аўдронюс Ажубаліс пасля сустрэчы міністраў у Хельсінкі.
«На нашу думку, за стол ніхто не сядзе, пакуль не будуць вызваленыя палітычныя зняволеныя», — па тэлефоне з Хельсінкі сказаў міністр.
Ажубаліс адзначыў, што адзіную пазіцыю васьмі краін афіцыйна выказаў міністр замежных спраў Фінляндыі, які выступіў з заявай, якая заклікае беларускае кіраўніцтва неадкладна вызваліць усіх палітычных зняволеных.
Аляксандр Лукашэнка выступіў з прапановай да палітычных апанентаў, прадстаўнікоў ЕС і Расіі за «круглым сталом» абмеркаваць сітуацыю ў краіне.
«Я як кіраўнік дзяржавы прапаную ўсім разумным людзям, якія любяць сваю краіну, да якога б палітычнага лагеру яны ні належалі, сесці за круглы стол, паглядзець адзін аднаму ў вочы і рэальна ацаніць, хто чаго варты і што можа зрабіць для эфектыўнага паляпшэння сітуацыі ў краіне», — сказаў ён на нарадзе педагагічнага актыву Беларусі.
Паводле яго слоў, «наша сіла ў адзінстве, і будучыню краіны трэба вырашаць не на плошчах і барыкадах, а шляхам дыялогу, нармальнай чалавечай гутаркі».
У згаданай сустрэчы ў Хельсінкі, акрамя літоўскага і фінскага міністраў, таксама ўзялі ўдзел міністры замежных спраў Швецыі, Латвіі, Ісландыі і Эстоніі, а таксама службовыя асобы Даніі і Нарвегіі.
«Я хачу справядлівасці — і для жанчын, і для сябе». Шчырая гутарка з Андрэем Стрыжаком пра скандал з дыкпікамі, залежнасці і будучыню16
Каментары