Кары Хейкіля: На хакейным «Турніры чатырох» асноўным прыярытэтам з’яўляецца вынік

Для беларускай хакейнай зборнай, якой 10–11 лютага трэба будзе выступаць у Мінску на «Турніры чатырох на прызы BelSwissBank», галоўным прыярытэтам з’яўляецца вынік.

«Магчыма, мы будзем гуляць нават у тры звяны, бо галоўнае для нас на гэтым турніры — гэта вынік», — канстатаваў коуч.

З самага пачатку планавалася, што на дамашнім турніры каманда выступіць у аптымальным складзе,

аднак па розных прычынах беларусы недалічыліся шэрагу ключавых гульцоў.

«Зразумела, што мы спадзяваліся сабраць усіх лепшых, але нічога не зробіш. Трэба думаць на перспектыву. Мяркую, для дынамаўцаў гэты збор у ААЭ пойдзе на карысць і да самых важных матчаў у красавіку-маі яны падыдуць у лепшай кандыцыі. Да таго ж пры адсутнасці гэтых гульцоў мы зможам праверыць новых», — па-філасофску падышоў да праблемы Хейкіля.

Разам з тым ён не абмінуў падкрэсліць, што штучна не збіраецца нікога «цягнуць» у склад і выкліканыя на замену кахээлаўцам хакеісты з адкрытага чэмпіянату Беларусі атрымаюць гульнявую практыку, толькі калі дакажуць сваю грунтоўнасць.

Паводле слоў Хейкіля, месца ў варотах у абодвух матчах беларусаў на турніры зойме самы спрактыкаваны варатар «зуброў» Андрэй Мезін.

Галоўны трэнер зборнай выказаў упэўненасць у тым, што гісторыя з «Кубкам Палесся» (гэта быў першы турнір для Хейкіля ў якасці рулявога беларусаў), на якім, нагадаем, каманда ў лістападзе 2011 года зведала поўнае фіяска, калі з буйным лікам прайграла ўсе матчы і прадэманстравала вельмі слабую гульню, не паўторыцца. «Зараз у нас абсалютна іншая каманда, іншы ўзровень. У Гомелі гэта быў своеасаблівы няўдалы эксперымент», — упэўнены Хейкіля.

Апрача беларусаў (11-е месца ў сусветным рэйтынгу) у «Турніры чатырох на прызы BelSwissBank» згуляюць зборныя Швейцарыі (7), Германіі (8) і Славакіі (10).

10 лютага ў 15.30 згуляюць каманды Швейцарыі і Славакіі, а ў 19.00 на лёд выйдуць зборныя Беларусі і Германіі. 11 лютага прайграўшыя каманды сустрэнуцца ў матчы за 3-е месца ў 15.30, а пераможцы сыдуцца ў фінальным паядынку ў 19.00. Усе гульні пройдуць на «Мінск-Арэне».

Склад зборнай Беларусі:

варатары: Андрэй Мезін (1974, «Дынама-Мінск»), Леанід Грышукевіч (1978, «Металург-Жлобін»), Ян Шаляпнёў (1993, «Дынама-Шынік»);

абаронцы: Алег Гарошка (1989), Дзмітрый Корабаў (1989) (абодва — «Дынама-Мінск»), Павел Чарнавок (1986), Андрэй Башко (1982) (абодва — «Шахцёр»), Андрэй Антонаў (1985, «Нёман»), Іван Усенка (1983, «Юнацтва»), Алег Місюль (1993, «Лока», МХЛ), Мікалай Стасенка (1987, «Северсталь»), Віктар Касцючонак (1979, «Аўтамабіліст»);

нападаючыя: Сяргей Дудко (1991), Сяргей Дрозд (1990), Анатоль Пратасеня (1990), Міхаіл Стэфановіч (1989), Аляксандр Паўловіч (1988), Аляксандр Кітараў (1987) (усе — «Дынама-Мінск»), Канстанцін Захараў (1985, «Юнацтва»), Арцём Бажко (1985, «Нёман»), Андрэй Коласаў (1989, «Гомель»), Яўген Кавыршын (1986, «Северсталь»), Андрэй Сцяпанаў (1986, «Амур»), Канстанцін Кальцоў (1981, «Салават Юлаеў»), Аляксей Калюжны (1977, «Авангард»).

• 0
• 0
• 0
• 0
• 0
• 0
• 0
• 0