Будаўніцтва па-беларуску: Венесуэла ў шоку

Мясцовыя журналісты падазраюць яе ў сувязях з мафіяй, абвінавачваюць у кепскім стаўленні да працоўных і несумленным выкананні работ. «Беларуская мафія» — так называецца адзін з артыкулаў, якія прысвяціла гэтай кампаніі венесуэльская газета «Эль Універсал».

Аўтар гэтай і яшчэ адной публікацый аб «Белзамежбудзе» Ёзэф Палішук выказвае меркаванне, што дзейнасць БЗБ у лацінаамерыканскай краіне стала адной з прычын арышту беларускага бізнэсмена Віктара Шаўцова, які ўзначальваў яе праўленне.

Каля чатырох гадоў таму Беларусь абяцала пабудаваць у Маракаі і Каракасе 17 500 кватэр, але гэтыя абяцанні не былі выкананыя,

Варта адзначыць, што ў Венесуэле беларусы будуюць не самі, а наймаюць венесуэльскіх падрадчыкаў, якімі кіруюць праз ваенных перакладчыкаў.

Будаўніцтва суправаджалася дзейнасцю гэтак званай «арматурнай мафіі», якая займалася кантрабандай жалеза.

Газета пацікавілася ў прадстаўніка БЗБ Андрэя Атрашкевіча, ці звязаны арышт Віктара Шаўцова з сітуацыяй у Венесуэле. Атрашкевіч з гэтым меркаваннем не згодны, ён мяркуе, што бізнэсмена арыштавалі ў сувязі з яго дзейнасцю ў Іраку.

Венесуэльскі журналіст адправіўся ў Маракай, каб на месцы высветліць, як ідуць справы з беларускім будаўніцтвам.

Аказалася, што 29 снежня мінулага года ў горадзе былі здадзеныя пад ключ 720 кватэр (усяго каля 4% ад праектных 17 500), але з таго дня і да 3 студзеня 2012 года нават у іх не было электрычнасці і каналізацыі!

На фатаграфіях, апублікаваных «Эль Універсал», паказаныя неспрыяльныя жыллёвыя ўмовы ў кватэрах Маракая, ужо здадзеных беларусамі.

* * *

Віктар Шаўцоў быў знаёмы не толькі з прэзідэнтам Уга Чавесам, але і з нябожчыкамі Садамам Хусэйнам і Муамарам Кадафі. Сярод іншага, ён узначальваў Таварыства беларуска-іракскай дружбы, уваходзіў у беларуска-лівійскую камісію па эканамічным, гандлёвым і навукова-тэхнічным супрацоўніцтве. «Белзамежбуд» узначаліў у 2007 годзе. Гэтая кампанія «стала трымальнікам асноўных кантрактаў па пастаўках беларускай тэхнікі і абсталявання і заказчыкам і падрадчыкам па ўсіх будаўнічым праектах у Венесуэле — на мільярды даляраў», піша «Штодзённік».

Віктар Шаўцоў падазраецца ў асабліва буйным крадзяжы. Як паведамлялася раней, у дачыненні да топ-менеджараў ЗАТ «Белзамежбуд» у кастрычніку 2011 года была заведзена крымінальная справа. Следствам правяралася інфармацыя аб дачыненні Шаўцова да здзяйснення супрацьпраўных дзеянняў пры падрыхтоўцы і рэалізацыі эканамічных праектаў у Венесуэле.

«Падставай для завядзення крымінальнай справы паслужыла інфармацыя аб яго дачыненні да крадзяжу грашовых сродкаў, якія знаходзіліся на рахунках аднаго з банкаў.

На прэс-канферэнцыі ў Мінску 23 сьнежня 2011 года Аляксандр Лукашэнка заявіў, што ў выпадку пакрыцця дзяржаве нанесенай шкоды Віктар Шаўцоў будзе вызвалены. «Шкода нанёс дзяржаве — грошы на стол у двухразовым-трохразовым памеры, і пайшоў. Не заплаціць грошы — будзе сядзець у турме», — сказаў Лукашэнка.

Лукашэнка падкрэсліў, што гэта шараговае эканамічнае злачынства, звязанае з вывадам грошай і правапарушэннем ў сувязі з будаўніцтвам аб’екта ў Венесуэле. «Гэта звычайная крымінальная справа, у нас такіх хапае. Нават ёсць крымінальныя справы больш сур’ёзныя», — адзначыў ён. Але дадаў: «Гэты спадар не ў першы раз трапляе ў поле зроку праваахоўных органаў».

Венесуэла — адзін з найважнейшых саюзнікаў Беларусі на сусветнай арэне, таму скандал з «Белзамежбудам» ляжыць не толькі ў эканамічнай, але і ў палітычнай плоскасці.

• 0
• 0
• 0
• 0
• 0
• 0
• 0
• 0