У мінскім кінатэатры «Ракета» 5–31 кастрычніка праект Cinemascope прадстаўляе рэтраспектыву фільмаў Орсана Уэлса — аднаго з найвялікшых амерыканскіх кінематаграфістаў мінулага стагоддзя.
Вядомы кіназнаўца Андрэ Базен назваў яго «тытанам Адраджэння ў Амерыцы ХХ стагоддзя». Орсан Уэлс прачнуўся вядомым у 23 гады пасля сваёй радыёпастаноўкі «Вайна светаў» паводле Герберта Уэлса, якая прымусіла амерыканцаў паверыць у рэальнасць уварвання марсіян на Зямлю. Да 26 гадоў ён заваяваў тэатральныя падмосткі, зняў «лепшы фільм усіх часоў і народаў» і трапіў на вокладку часопіса Time. Дзякуючы ашаламляльным рухам камеры, дасціпнаму мантажу і майстэрскай працы з акцёрамі рэжысёр заслужыў рэпутацыю генія і «найвялікшага паэта кінематографа» (Франсуа Труфо).
У рэтраспектыве прадстаўлены работы Уэлса пачынаючы з 1941 года, уключаючы дэбютны фільм рэжысёра «Грамадзянін Кейн».У аснову сюжэта карціны лягла рэальная гісторыя любоўнай сувязі газетнага магната Уільяма Рэндальфа Херста і актрысы Мэрыён Дэвіс. Медыямагнат, з імем якога звязваюць з’яўленне тэрміну «жоўтая прэса», не змог вытрымаць замахаў на гісторыю ўласнага жыцця: ён пачаў сапраўдную вайну супраць фільма. Стужка перажыла байкот прэсы і пракат выключна ў невялікіх незалежных кінатэатрах.
Сёння «Грамадзянін Кейн» стаў падручнікам аператарскага і апавядальнага майстэрства. Гэта фільм, якому сучасны кінематограф абавязаны мастацтвам нелінейнага апавядання і выкарыстаннем новых сродкаў мастацкай выразнасці. Доўгі час «Грамадзянін Кейн» займаў першае месца ў рэйтынгу лепшых фільмаў усіх часоў аўтарытэтнага брытанскага выдання Sight&Sound, толькі сёлета ўступіўшы яго «Галавакружэнню» Альфрэда Хічкока.
Сярод позніх работ Уэлса, прадстаўленых у праграме, — экранізацыя «Працэсу» Кафкі, класічны нуар «Пячатка зла» і кінаэсэ «Ф як Фальшыўка», прысвечанае праблеме фальсіфікацый у мастацтве.
Паказам 5 і 12 кастрычніка папярэднічаюць лекцыі культуролага Максіма Жбанкова. Усе фільмы дэманструюцца на мове арыгінала з рускімі субцітрамі.
Цяпер чытаюць
«Далі 3600 рублёў штрафу». На беларуску напісаў палітычны данос хлопец, з якім яна хадзіла на спатканні і якога злавіла на здрадзе31
Каментары