Ніводны беларускі ўніверсітэт не трапіў у топ-400 найлепшых ВНУ свету
Першае месца заняў Каліфарнійскі тэхналагічны інстытут.
Беларускія ўніверсітэты зноўку не патрапілі ў спіс 400 лепшых універсітэтаў свету. Рэйтынг на 2012–2013 гады быў складзены дадаткам аўтарытэтнай газеты The Times — Times Higher Education. Месяц таму БДУ быў названы сярод 600 лепшых ВНУ свету паводле іншага рэйтынгу ўніверсітэтаў.
Рэйтынг The Times Higher Education увесь час пакідае за сваімі межамі беларускія ўніверсітэты. Першае месца ў ім зноўку заняў Каліфарнійскі тэхналагічны інстытут, а другое падзялілі Оксфардскі ўніверсітэт у Вялікабрытаніі і Стэнфардскі — у ЗША.
У рэйтынгу лепшых паводле Times звыкла дамінуюць амерыканскія ўніверсітэты, аднак да іх набліжаюцца азіяцкія ўніверсітэты. Найперш з Кітаю і Сінгапуру.
Адсутнасць беларускіх універсітэтаў у сусветных рэйтынгах — хутчэй заканамернасць, чым выключэнне. Хаця апошнім часам Беларускі дзяржаўны ўніверсітэт і здолеў значна ўзняцца ў іншых вядомых ТОПах, у прыватнасці ў рэйтынгу Webometrics, які складаецца гішпанскай даследчыцкай групай паводле вызначэння якасці вэб-старонак універсітэтаў, а таксама ў спісе кампаніі Quacquarelli Symonds (QS), беларускія ўніверсітэты ў большасці застаюцца па-за ўвагай падобных пералікаў.
Цікава, што высновы двух найбольш аўтарытэтных рэйтынгаў: QS і The Times Higher Education — значна разыходзяцца не толькі ў ацэнцы месца БДУ у сусветнай адукацыйнай супольнасці. Два рэйтынгі звыкла аддаюць першыя пазіцыі розным ВНУ, што звязана з адрознай метадалогіяй ацэнак.
Верагодна, з гэтым звязаныя і лепшыя пазіцыі ВНУ з былой савецкай прасторы ў апошнім рэйтынгу QS.Як кажуць эксперты, The Times Higher Education, дзе беларускіх ВНУ пакуль не было, грунтуецца найперш на ацэнцы адукацыйных магчымасцяў універсітэтаў. А QS ацэньвае найперш рэпутацыю і апытвае нашмат шырэйшае кола экспертаў.
З суседніх з Беларуссю краін у рэйтынг The Times Higher Education трапілі па два ВНУ Польшчы і Расеі: Ягелонскі і Варшаўскі ўніверсітэты, а таксама МДУ і МІФІ з Масквы.
Цяпер чытаюць
Зяленскі ў Вільні: Пакуль шпіц Лукашэнкі мае больш правоў, чым народ Беларусі19
Каментары