Nivodny biełaruski ŭniviersitet nie trapiŭ u top-400 najlepšych VNU śvietu
Pieršaje miesca zaniaŭ Kalifarnijski technałahičny instytut.
Biełaruskija ŭniviersitety znoŭku nie patrapili ŭ śpis 400 lepšych univiersitetaŭ śvietu. Rejtynh na 2012–2013 hady byŭ składzieny dadatkam aŭtarytetnaj haziety The Times — Times Higher Education. Miesiac tamu BDU byŭ nazvany siarod 600 lepšych VNU śvietu pavodle inšaha rejtynhu ŭniviersitetaŭ.
Rejtynh The Times Higher Education uvieś čas pakidaje za svaimi miežami biełaruskija ŭniviersitety. Pieršaje miesca ŭ im znoŭku zaniaŭ Kalifarnijski technałahičny instytut, a druhoje padzialili Oksfardski ŭniviersitet u Vialikabrytanii i Stenfardski — u ZŠA.
U rejtynhu lepšych pavodle Times zvykła daminujuć amierykanskija ŭniviersitety, adnak da ich nabližajucca azijackija ŭniviersitety. Najpierš z Kitaju i Sinhapuru.
Adsutnaść biełaruskich univiersitetaŭ u suśvietnych rejtynhach — chutčej zakanamiernaść, čym vyklučeńnie. Chacia apošnim časam Biełaruski dziaržaŭny ŭniviersitet i zdoleŭ značna ŭźniacca ŭ inšych viadomych TOPach, u pryvatnaści ŭ rejtynhu Webometrics, jaki składajecca hišpanskaj daśledčyckaj hrupaj pavodle vyznačeńnia jakaści veb-staronak univiersitetaŭ, a taksama ŭ śpisie kampanii Quacquarelli Symonds (QS), biełaruskija ŭniviersitety ŭ bolšaści zastajucca pa-za ŭvahaj padobnych pieralikaŭ.
Cikava, što vysnovy dvuch najbolš aŭtarytetnych rejtynhaŭ: QS i The Times Higher Education — značna razychodziacca nie tolki ŭ acency miesca BDU u suśvietnaj adukacyjnaj supolnaści. Dva rejtynhi zvykła addajuć pieršyja pazicyi roznym VNU, što źviazana z adroznaj mietadałohijaj acenak.
Vierahodna, z hetym źviazanyja i lepšyja pazicyi VNU z byłoj savieckaj prastory ŭ apošnim rejtynhu QS.Jak kažuć ekśpierty, The Times Higher Education, dzie biełaruskich VNU pakul nie było, hruntujecca najpierš na acency adukacyjnych mahčymaściaŭ univiersitetaŭ. A QS aceńvaje najpierš reputacyju i apytvaje našmat šyrejšaje koła ekśpiertaŭ.
Z susiednich ź Biełaruśsiu krain u rejtynh The Times Higher Education trapili pa dva VNU Polščy i Rasiei: Jahiełonski i Varšaŭski ŭniviersitety, a taksama MDU i MIFI z Maskvy.
Kamientary