Сяргей Сахараў. «Народны альбом» на БТ

«Народны альбом» на БТ

19-20 студзеня ў будынку былога Палаца культуры, якi цяпер носiць годнае найменьне Дзяржаўны маладзёжны тэатар эстрады, праходзiлi запiсы канцэртаў «Жывы гук» у рамках тэлеканалу «Добрай ранiцы, Беларусь». Для тых, хто ня ведае: крыху зьмянiўшы зьнешнi выгляд, Беларуская тэлевiзiя паспрабавала паднавiць i вяшчальную сетку, зрабiўшы акцэнты на iнфармацыйна-забаўляльных праграмах. «Добрай ранiцы, Беларусь» i ёсьць адным з самых пэрспэктыўных праектаў БТ — усё цiкавае й нязьведанае выпрабоўваюць менавiта на гэтым ранiшнiм канале, дзе працуе больш-менш маладая публiка.

Канцэрты «Жывы гук» былi арганiзаваныя па некалькiх прычынах: па-першае, для таго, каб тэлегледачы маглi, нарэшце, пазнаёмiцца зь беларускай кагортай выканаўцаў, ацанiць iх майстэрства; па-другое, для самiх выканаўцаў, бо многiя зь iх дагэтуль ня маюць прафэсiйных video, па-трэцяе, каб вывесьцi «ў людзi» маладых выканаўцаў, да якiх з прысутных на канцэрце з пэўнымi заўвагамi можна аднесьцi толькi «Kriwi» ды «Mojo Blues». Дарэчы, кiраўнiк Дзяржаўнага аркестру М.Фiнберг на гэты конт выказаў не зусiм зразумелую для ягонага статусу думку пра тое, што беларускiя эстрадныя выканаўцы падобныя адно да аднаго, — такiм чынам падтрымаўшы акцыю.

У першы дзень канцэртаў на сцэну выходзiлi такiя прызнаныя калектывы краiны як «Улiс», «Камэрата», струнная група Дзяржаўнага аркестра п/к М.Фiнберга. На другi дзень былi выканаўцы iншага жанру: гурт «Mojo Blues», «NRM» i «Kriwi», напрыканцы быў рэпрэзантаваны праект «Народны альбом».

Акцыя сапраўды мелася быць грандыёзнай, але некаторыя тэхнiчныя накладкi, у тым лiку i з самым галоўным у назове акцыi — жывым гукам, якi пэрыядычна зьмяняў свае частоты ад нiзкiх да радыкальна высокiх, — ледзь ня зьвёў усё да чарговага пшыку.

Акцыя прынесла прыемныя нечаканасьцi i нават сэнсацыi. Цi не ўпершыню выступiў рок-гурт «Mojo Blues», якi аб’яднаў С.Кныша («Bonda»), I.Шэўчыка (ex-»Krama») ды А.Казлоўскага («Zindan»). Хлопцы, як ад iх i чакалi, адыгралi выдатны блюз. Выступ «NRM» чамусьцi нагадаў канец 80-х, калi «Мроя» грала канцэрты ў малых, «глухiх» залях на дрэннай апаратуры. Невядома чаму, але на перадапошняй песьнi гурта зьнiкла электрычнасьць, таму прыйшлося абвесьцiць вымушаны перапынак, пасьля якога гук падраўнялi, i слухаць «Песьнi пра каханьне» стала лягчэй. «Kriwi», як заўсёды, успрынялiся выдатна, але гук iзноў папсаваў усiм нэрвы.

Прэзэнтацыя «Народнага альбому» ў рамках тэлеканалу «Добрай ранiцы, Беларусь» сталася iспытам для ўдзельнiкаў праекту. Як вядома, гэты альбом канцэптуальна цэласны, таму й псыяхалягiчна i тэхнiчна было складана зрабiць нешта выбранае, як таго вымагала сытуацыя. З другога боку, цяжка было працаваць на публiку, якая мала ведае самiх музыкаў. Але ўдзельнiкi з годнасьцю вытрымалi такiя складанасьцi i даказалi, што «Народны альбом» — альбом для народа i пра народ.

Сяргей Сахараў

• 0
• 0
• 0
• 0
• 0
• 0
• 0
• 0