У Магілёве маёўцаў пахапалі
Улады адмовілі эсдэкам і Cвабодным прафсаюзам адмовілі ў правядзеньні мітынгу, маўляў, у горадзе праводзіцца афіцыйны мітынг на пл.Леніна. Тады апазыцыянэры выказалі жаданьне прыняць удзел у гэтым мітынгу.
Учора раніцай дзьве калёны рушылі ў бок плошчы Леніна. Калёна Маладога Фронту пайшла па вул.Ленінскай. Другая, Грамады і прафсаюзу, стала зьбірацца праз вуліцу ад пл.Леніна. Дэманстранты трымалі лёзунгі «Варты заробак — рабочым», «Не — росту цэнаў».
Міліцыянты пачалі затрымліваць патэнцыйных удзельнікаў мітынгу з абедзьвюх калёнаў, як толькі тыя рушылі.
Вось як апісвае падзеі лідэр абласнога Свабоднага прафсаюзу Юрась Новікаў:
— Нас затрымалі міліцыянты, акружылі і пачалі правяраць нашыя сьцягі і лёзунгі. Калі мы пачалі разгортваць сьцягі Свабоднага прафсаюзу, падпалкоўнік Аленушкін сказаў, што гэтую «свастыку» мы не дазволім вам разгортваць на плошчы, бо «вас могуць разарваць на часткі ветэраны». Тымчасам пачалі выхопліваць з шэрагаў нашых сябраў, якія несьлі транспаранты, сьцягі. А потым, пратрымаўшы дзьве гадзіны, іх адпускалі і казалі: «Мы вас не затрымлівалі. Вы самі сюды прыйшлі, вас ніхто не запрашаў».
15 магілёўцаў былі вызваленыя, толькі на пяцёх складзеныя пратаколы. Валер’я Сівуху і лібэрала Аванэса Мурадзяна абвінавачваюць у выкарыстаньні сьцягоў нявызначанага ўзору. Як заявілі супрацоўнікі міліцыі, наканечнік сьцяга можа быць выкарыстаны ў якасьці халоднай зброі, пасьля чаго прадэманстравалі, як гэта робіцца.
Мусіць, магілёўскія міліцыянты таксама хочуць рэпутацыю разгоншчыкаў мірных дэманстрацыяў.
Паводле Радыё Свабода
Цяпер чытаюць
Стала вядома, што за 200 тысяч еўра прапаноўвалі Сяргею Ціханоўскаму «беларускія бізнэсмены»11
Каментары