Папа пакуль не прыедзе
Сустрэцца з Папам у Кракаве, на ягонай радзіме, прыехалі два мільёны пілігрымаў зь дзясяткаў краінаў. Прысутнічалі прэзыдэнты Польшчы, Літвы і Славаччыны. Езьдзілі ў Кракаў і беларускія каталікі. На іх бел-чырвона-белых транспарантах быў надпіс “Беларусь чакае!”. Папа наведаў Літву, Украіну, неаднаразова Польшчу. Толькі Беларусь пакуль абмінае, хоць рэгулярна зьвяртаецца па-беларуску да пілігрымаў. Прычына простая: Папа — кіраўнік Ватыкану, незалежнае дзяржавы, і ягоны візыт можа адбыцца толькі на запрашэньне кіраўніка іншае краіны. Тым больш нечаканым сталася паведамленьне “Gazet’ы Wyborcz’ай”: мітрапаліт менска-магілёўскі, кардынал Казімер Сьвёнтак заявіў, што Аляксандар Лукашэнка зацікаўлены ў візыце Яна Паўла ІІ у Беларусь.
Прэсавы сакратар Міністэрства замежных справаў Павал Латушка гэтую інфармацыю катэгарычна абвергнуў: “Перамовы пра магчымы прыезд Папы ў Беларусь сёньня не вядуцца і ў найбліжэйшым часе не плянуюцца”. Вікарны намесьнік Менска-Магілёўскай арцыдыяцэзіі біскуп Кірыла Клімовіч кажа: “Гэта была б сэнсацыя! Каталіцкі Касьцёл у Беларусі моліцца, каб Папа наведаў Беларусь. Але я сам вось толькі што вярнуўся з Кракава, з сустрэчы з Папам — пакуль што нават гаворкі такой не вялося”. Не пацьвердзілі інфармацыі польскага выданьня і ў нунцыятуры апостальскага пасаду ў Беларусі. Так што Папа ў Беларусь пакуль ня едзе.
Аднак публікацыя ў “Gazet’е Wyborcz’ай” не пустыя плёткі. Менск сапраўды можа быць “зацікаўлены” ў візыце, і кардыналу Сьвёнтку гэта можа быць вядома. Візыт Сьвятога Айца стаўся б сымбалічным для нацыянальнага сувэрэнітэту актам і, зразумела, сапраўдным сьвятам для каталікоў краіны. Ён зрабіў бы для паляпшэньня іміджу Беларусі ў сьвеце болей, чым любыя дыпляматычныя захады. Іншая рэч, што Менск ніколі раней не дазваляў сабе такой самастойнасьці ў замежнай палітыцы.
Публікацыю ў “Gazet’е Wyborcz’ай” пасьля пуцінскага “халоднага душу” можна расцэньваць як чарговую напамінку: ніколі не бывае занадта позна.
Аркадзь Шанскі
Цяпер чытаюць
«Губазікаўцы схіляюць Калеснікаву да высылкі, але яна не хоча»1
Каментары