каля футболу
Малафееў згуляўся з Канаплёвым
Сэнсацыйная папера лягла ў пятніцу на стол кіраўніку Беларускай фэдэрацыі футболу Рыгору Фёдараву: галоўны трэнэр нацыянальнай зборнай Эдуард Малафееў паведаміў, што складае зь сябе паўнамоцтвы і сыходзіць у адстаўку ў сувязі з пагаршэннем стану здароўя, выхадам на пэнсію і нэгатыўным стаўленьнем да яго некаторых СМІ. У нядзелю з гэтай нагоды была сабраная экстранная нарада фэдэрацыі футболу. Адстаўка Малафеева прынятая не была, а кіраўніцтву фэдэрацыі і Міністэрства спорту было даручана сустрэцца зь ім і пераканаць зьмяніць рашэньне. Да старту Беларусі ў адборачным турніры чэмпіянату Эўропы заставалася шэсьць дзён...
Звышэкспрэсіўны характар галоўнага трэнэра зборнай даўно вядомы, і такія ўчынкі — у ягоным стылі. Адразу ж зьявіліся разнастайныя вэрсіі, тым больш што ў прэс-службе фэдэрацыі футболу нічога, што праліло б сьвятло на падзеі, не паведамлялі.
Першая зь верагодных вэрсіяў — Малафееву прапанавалі кантракт зь нейкім замежным клюбам на вельмі выгодных фінансавых умовах (вядома, што ў БФФ супэргрошай няма). Другая — Малафееў пасля шэрагу перамогаў нацыянальнай зборнай і ўздыму рэйтынгу спужаўся верагоднага правалу ў стартавых гульнях адборачнага турніру. Яшчэ казалі, што галоўны трэнэр палаяўся з кіраўніцтвам фэдэрацыі падчас апошняй скандальнай справаздачна-выбарчай канфэрэнцыі, якую перанесьлі на зіму. Але самай блізкай да праўды ўрэшце выявілася вэрсія пра звычайны эмацыйны зрыў.
Зборная напярэдадні адказнай гульні апынулася ў стане, блізкім да шокавага. І якія б прычыны “псіхануць” ні былі ў Малафеева, апраўдацца яму ў выніку сыходу было б наўрад ці магчыма.
У панядзелак увечары ў Менск на першую трэніроўку сабраліся гульцы нацыянальнай зборнай, але Малафееў не зьявіўся і праводзіў яе іншы трэнэр — Валеры Стральцоў. У аўторак Малафееў зьявіўся на ранішнюю трэніроўку зборнай, але ніякіх абяцаньняў наконт далейшай працы не даваў. Улагодзіць яго здолелі толькі ўрадоўцы на чале зь віцэ-сьпікерам палаты прадстаўнікоў Уладзімерам Канаплёвым. Пасьля размовы з будучым калегам (зямляк Лукашэнкі Канаплёў мае зрабіцца прэзыдэнтам БФФ замест Рыгора Фёдарава), трэнэр раздумаў кідаць зборную. І журналістам таксама дараваў. Праўда, у выніку хваляваньняў у сераду лёг у больніцу з гіпэртанічным крызам.
Аляксей Шыдлоўскі
Цяпер чытаюць
Галыгіна прымусілі апраўдвацца за зварот да сілавікоў у 2020-м14
Галыгіна прымусілі апраўдвацца за зварот да сілавікоў у 2020-м
«Вайна ўсё спіша». Беларускім удзельнікам гей-прайда ў Вільні пагражалі расправай ад імя беларускіх ваяроў за выкарыстанне бела-чырвона-белага сцяга219219
Каментары